APM ၊ ဂျန်နဝါရီ ၅ / ၂၀၂၄
ဒေနိ (ဂျန်နဝါရီ ၅ ရက်နိ) နိခင်းက အကြမ်းဖက်စစ်ကောင်စီတပ်လက် နက်ကြီးနန့်ပစ်လို့ ဘူးသီးတောင်မြို့နယ်က အမျိုးသမီးကြီးတယောက် ပြင်းပြင်း ထန်ထန် ဒဏ်ရာရလားကြောင်းသိရပါရေ။
ဒဏ်ရာရလားလူစွာ ဘူးသီးတောင်မြို့နယ်၊ စံညှင်းဝေအုပ်စု၊ ကွန်တိုင်(ရက္ခိုင်)ရွာက ဒေါ်အေးချမ်းသာ(၆၇ နှစ်) ဖြစ်ပါရေ။
ဒေါ်အေးချမ်းသာစွာ ဒေနိနိခင်း ၁ နာရီလောက်က သားဖြစ်သူ၏ အိမ်နားမာ ကွမ်းသီးဆွတ်နီချိန် ဘူးသီးတောင်အခြီစိုက်စစ်ကောင်စီတပ် စကခ(၁၅) လက်အောက်ခံ ခမရ (၅၆၅)တပ်ရင်းက ပစ်လိုက်တေ လက်နက်ကြီးကျည်ကျရောက်ပေါက်ကွဲပနာ ဒေါ်အေးချမ်းသာ၏ ဘယ်ဖက်ပက်ခုံးမာ ကျည်စဝင်လားပြီးကေ ပြင်းထန်ဒဏ်ရာရဟိလားရေလို့ မျက်မြင်ဒေသခံတိကပြောပါရေ။
လက်ဟိ ဒေါ်အေးချမ်းသာစွာ ဘူးသီးတောင်မြို့ဆီးရုံကြီးမာ အရေးပေါ်ဆီးကုသမှုခံယူနီရကြောင်း သိရပါရေ။
Please follow and like us:
