APM၊ ဂျန်နဝါရီ ၅/ ၂၀၂၃
၁၀၂၇ စစ်ဆင်ရီး (၇၁) ရက်မြောက်နိဖြစ်တေ ဒေနိ(ဂျန်နဝါရီ ၅ ရက်နိ)မာ ကိုးကန့်ဒေသမာ လက်နက်ချအညံ့ခံလာရေ စစ်ကောင်စီတပ်ဖွဲ့ဝင် စုစုပေါင်း ၂၃၈၉ ယောက်ဟိကြောင်း ညီနောင်မဟာမိတ် (၃) ဖွဲ့က ထုတ်ပြန်ပါရေ။
ဒေနိ(ဂျန်နဝါရီ ၅ ရက်)နိမာ ထောင်ချီရေ တပ်ဖွဲဝင်များပါဝင်ရေ ဒကစ (လောက်ကိုင်) တခုလုံးအပါအဝင် ၎င်းပတ်ဝန်းကျင် အတွင်းဟိသမျှ တပ်ရင်းစခန်းအားလုံးရို့က ခွီးတကောင်၊ ကြောင်တမြီး မကျန် လက်နက်ချ အညံ့ခံခကတ်ရာ ကိုးကန့် (လောက်ကိုင်) တခွင်လုံးရေ စစ်ကောင်စီ ကင်းစင်သည့်နယ်မြီ ဖြစ်ခပြီး အဆိုပါမြင်ကွင်းမာ မြန်မာ့တပ်မတော် လို့ခေါ်ရေ စစ်ကောင်စီသမိုင်းမာ စစ်အာဏာသျှင်စနစ်နိဂုံးချုပ်ဖို့ အကြိုနိရက်တိဖြစ်တေလို့ ထုတ်ပြန်ချက်မာ ဖော်ပြထားပါရေ။
ဒေနိ လက်နက်ချအညံ့ခံကတ်တေအထဲမာ ဒကစ (လောက်ကိုင်) ကို စစ်ကူပီးဖို့ရောက်လာကတ်တေ မြန်မာပြည်အနှံ့ဟိ တပ်မ၊ တပ်ရင်းတိအစုံထဲက တယောက်မကျန်ပါဝင်ခပြီး ယင်းအထဲမာ ဗိုလ်မှူးချုပ်အဆင့်ဟိလူ (၆) ယောက်အပါအဝင် အရာဟိ (၂၂၈)ယောက်၊ ရဲဖော်အပါအဝင် အခြားအဆင့်ဟိလူ (၁၈၉၅) ယောက်ပါဝင်ပနာ ၎င်းရို့၏ မိသားစုဝင်စုစုပေါင်း (၁၆၀၁) ယောက်ပါဝင်ရေလို့ သိရပါရေ။
ညီနောင်မဟာမိတ်(၃)ဖွဲ့အနီနန့် ၎င်းရို့အားလုံးကို လားလိုရေနီရာနန့် လုံခြုံရေနီရာသို့ ပို့ဆောင်ထားပြီးဖြစ်တေလို့ ဆိုပါရေ။
နောက်ဆက်တွဲအနီနန့် ပွိင့် (၂၀၂၂) လို့ လူသိများရေ ကိုးကန့်အခေါ် နမ်ထင်းမိန်ရှန်း က စစ်ကောင်စီတပ်ဖွဲ့ဝင် (၂၆၆) ယောက်လည်း ညီနောင်မဟာမိတ်(၃)ဖွဲ့ထံ နောက်ဆုံးအသုတ်အနီနန့် လက်နက်ချခစွာကြောင့် လက်နက်ချအလင်းဝင်လူ စုစုပေါင်းမာ (၂၃၈၉) ယောက်အထိဟိခပြီး ဖက်ဆစ်တပ်ဂေါင်းဆောင် မင်းအောင်လှိုင်၏ နောက်ဆုံးထွက်သက် နိရက်တိအတွက် နှစ်သစ်အကြိုနိဒါန်းဖြစ်တေလို့ ဆိုပါရေ။
ညီနောင်မဟာမိတ်(၃)ဖွဲ့၏ စစ်ဆင်ရီးကာလ (၇၁) ရက်မြောက်နိဖြစ်တေ ဒေနိ(ဂျန်နဝါရီ ၅ ရက်နိ)ရေ ၁၀၂၇ စစ်ဆင်ရီး ကာလ အတွင်း အထွတ်အထိပ်နိနန့် စိတ်အလှုပ်ယှားဆုံးနိတရက်ဖြစ်ခကြောင်းနန့် မြန်မာပြည်သူပြည်သားတိအတွက် ညီနောင်မဟာမိတ် (၃)ဖွဲ့၏ အကောင်းဆုံး နှစ်သစ်လက်ဆောင်မွန်ကောင်းဖြစ်လိမ့်မေလို့ အပြည့် အဝယုံကြည်ကြောင်း ထုတ်ပြန်ချက် မာ ထည့်သွင်းဖော်ပြထားပါရေ။
ယင်းအပြင် ဆက်လက်လို့ ဒေဂုထက် ကောင်းမွန်လှပပြည့်စုံပြီး အနှစ်သာရအဟိဆုံးသော လက်ဆောင်မွန်ကောင်းတိကို ထပ်မံပီးအပ်နိုင်ဖို့အတွက် ညီနောင်မဟာမိတ်(၃)ဖွဲ့အနီနန့် အကောင်းဆုံးကြိုးစားနီကြောင်း အသိပီးထားပါရေ။
ညီနောင်မဟာမိတ်(၃)ဖွဲ့အနီနန့် စစ်ဆင်ရီးကာလအတွင်းသဘောထား ကြီးစွာနန့် လက်နက်ချအညံ့ခံရေ မြန်မာ့တပ်မတော် သားတိကို ကောင်းစွာကြိုဆိုလက်ခံပြီး ၎င်းရို့၏ ဆန္ဒအတိုင်း စိတ်ကျေနပ်အောင် အတတ်နိုင်ဆုံး ဖြည့်ဆည်းပီးခ ကြောင်း နန့် ယင်းသို့ ညီနောင်မဟာမိတ် (၃)ဖွဲ့နန့် ထိတွိဆက်ဆံဖူးရေ စစ်ကောင်စီတပ်ဖွဲ့ဝင်တိုင်းစွာ ညီနောင်မဟာမိတ် (၃) ဖွဲ့၏ စေတနာကို ကောင်းစွာနားလည်ပြီးကေ ပြောကေပြောရေအတိုင်းလုပ်တတ်တေ အစုအဖွဲ့ဖြစ်ကြောင်းကို သိထားကတ် တေလို့ ဆိုပါရေ။
စစ်ဆင်ရီးကာလအတွင်း စစ်ကောင်စီတပ်ဖက်က တပ်ရင်းအလိုက် လက်နက်ချအညံ့ခံကတ်တေ ဖြစ်ရပ်တိ ဟိခရေပိုင် တပ်ရင်းအလိုက် ပြည်သူ့ရင်ခွင်အတွင်းသို ဝင်ရောက်ခိုလှုံခကတ်တေ ဖြစ်ရပ်တိလည်းဟိခကြောင်း၊ အဆိုပါ လက်နက်ချ အညံ့ခံရေလူတိနန့် ပြည်သူ့ရင်ခွင်ခိုလှုံကတ်တေလူတိကို မြန်မာပြည်သူလူထုတရပ်လုံးက သူရဲကောင်းတိ အဖြစ် သတ်မှတ် ထားကြောင်း ဖော်ပြထားပါရေ။
ယင်းကြောင့် ဆက်လို့လည်း သူများနည်းတူ မြန်မာပြည်၏ တခြားဇာနီရာမာမဆို ညီနောင်မဟာမိတ်(၃)ဖွဲ့ထံ လက်နက်ချ အလင်းဝင်လိုကေဖြစ်စီ၊ ပြည်သူ့ရင်ခွင်ထဲ ဝင်ရောက်ခိုလှုံလိုကေဖြစ်စီ အချိန်မရွီး ဆက်သွယ်နိုင်ကြောင်း အသိပီးထား ပါရေ။
