
APM ၊ မေ ၄ / ၂၀၂၃
မြောက်ဦးမြို့နယ် ကျောက်ကျပ်ကျေးရွာအလွန် ရန်ကုန်-စစ်တွေ အဝီးဗြီးလမ်းမကြီးထက်တွင် မေ ၃ ရက်နိက ဆရာတော် ၃ ပါးစီးလာသည့်ကားတစီး အဟိန်မထိန်းနိုင်ဘဲလမ်းဘေးဓာတ်တိုင်ကို ဝင်တိုက်ရာ ကားထက်တွင်ပါလာသည့် ဆရာတော် နှစ်ပါး ဒဏ်ရာပြင်းပြင်းထန်ထန် ရဟိလားကြောင်း သိရသည်။
ဒဏ်ရာရလားသည့် ဆရာတော်နှစ်ပါးမှာ ကျောက်တော်မြို့နယ်၊ ညောင်ချောင်းကျေးရွာ ဘုန်းတော်ကြီးကျောင်းတွင် သီတင်း သုံးနီထိုင်တော်မူသည့် ဆရာတော် အသျှင်သုမနနန့် အသျှင်အာစိဏ္ဏရို့ဖြစ်ကတ်သည်။
ဆရာတော် အသျှင်သုမန နန့် အသျှင်အာစိဏ္ဏရို့သည် မေ ၃ ရက်နိညဇာ ၅ နာရီခွဲက နောက်ထပ်ဆရာတော်တပါးနန့်အတူ ဆရာတော် အသျှင်သုမန ကိုယ်တိုင်မောင်းနှင်သည့်ကားဖြင့်မြောက်ဦးမြို့မှပြန်ကြွလာကတ်သည်။
ယင်းသို့လာစဉ်ကျောက်ကျပ်ကျေးရွာအလွန် အဝီးဗြီးလမ်းမကြီးထက်၌ ဆရာတော်များစီးလားသည့်ကားမှာ ဘယ်ဖက် ကားဘီးပေါက်လားကာ အဟိန်မထိန်းနိုင်ဘဲ လမ်းဘေး ဓါတ်တိုင်ကို အဟုန်ပြင်းပြင်းဖြင့် ဝင်တိုက်မိလားခြင်းဖြစ်သည်။
ယင်းသို့ တိုက်မိခြင်းကြောင့် ကားမောင်းလာသည့် ဆရာတော်အသျှင်သုမန၌ ဘယ်ဖက်လက်မောင်းကျိုးလားကာ ကား ဂေါင်းခန်း၌ လိုက်ပါလာသည့် ဆရာတော်အသျှင်အာစိဏ္ဏမှာ ဦးဂေါင်းတွင်ဒဏ်ရာပြင်းပြင်းထန်ထန်ရဟိလားခပြီး ကျန် ဆရာတော်တပါးမှာတော့ ထိခိုက်ဒဏ်ရာမရဟု သိရသည်။
ဘယ်ဖက်လက်မောင်းကျိုးလားခသည့်ဆရာတော်အသျှင်သုမနမှာ စစ်တွေဆီးရုံးကြီး၌ဆီးကုသမှုခံယူလျက်ဟိပြီး ဦးဂေါင်း တွင် ဒဏ်ရာပြင်းပြင်း ထန်ထန်ရလားခသည့် ဆရာတော်အသျှင်အာစိဏ္ဏမှာတော့ စစ်တွေဆီးရုံ၌ ဆီးကုသမှုခံယူရာ မသက် သာသဖြင့် ရန်ကုန်ဆီးရုံးကြီးသို့ ပို့ဆောင်လိုက်ရကြောင်း သိရသည်။
