APM ၊ ဧပြီ ၄ / ၂၀၂၃
မောင်တောမြို့နယ်တောင်ပိုင်း၊ ကိုင်းကြီး(မြို)ရွာ နန့် မောရဝတီရွာကြားတွင် ဒေနိ (ဧပြီ ၄ ရက်နိ) နိခင်းက ကုန်တင်ကား ကြီးတစီးနန့် ဆိုင်ကယ်တစီးတိုက်မိရာ ဆိုင်ကယ်မောင်းလာသူ နှစ်ယောက် ပွဲချင်းပြီးသီဆုံးလားခကြောင်း သိရသည်။
သီဆုံးလားသူ နှစ် ယောက်မှာ ရသေ့တောင်မြို့နယ်၊ စေတီပြင်အနောက် တောင်ရွာမှ ဦးအောင်လှထွန်း (၅၂နှစ်) နန့် ၎င်း၏ သမက် ဦးမောင်ခင်သန်း (၂၆နှစ်)ရို့ ဖြစ်ကတ်သည်။
ဦးအောင်လှထွန်းနန့် ဦးမောင်ခင်သန်းရို့သည် ဒေနိ၊နိခင်း ၂ နာရီခန့်က ဝါးတုတ်ချိုး၍ပြန်လာစဥ် ကိုင်းကြီး(မြို) ရွာနန့် မောရဝတီရွာအကြားအရောက်တွင် ဘူးသီးတောင်ဖက်မှ ကုန်ပို့၍ပြန်လာသော ကုန်တင်ကားကြီးတစီးက ဝင်တိုက် မိခခြင်းဖြစ်သည်။
ယင်းသို့ ဝင်တိုက်မိခမှုကြောင့် ဦးအောင်လှထွန်းနန့် ဦးမောင်ခင်သန်းရို့ နှစ်ယောက်စလုံး နီရာတွင်ပင် ပွဲချင်းပြီး သီဆုံးခ ရပြီး ကုန်တင်ကားကြီးမှာတော့ မရပ်တန့်ခဘဲ အငူမော်-မောင်တောကားလမ်းအတိုင်း အငူမော်ဆိပ်ကမ်း ဖက်သို့ ဆက် မောင်းလားခသည်။
လက်ဟိတွင် သီဆုံးလားသူ နှစ်ယောက်ကို မောင်တောမြို့နယ်ကရုဏာကွန်ယက်အသင်းက လူနာတင်ယာဥ် (၁)စီးဖြင့် ယူဆောင်လျက် မောင်တောဆီးရုံကြီး၊ ရင်ခွဲရုံသို့ ပို့ဆောင်ထားပြီး ကုန်တင်ကားကြီးကိုလေ့ မြင်းလွတ်၊ နခခ (၉)တပ်ရင်း လက်အောက်ခံ၊ ရွာသစ်ကေ နခခ ကင်းစခန်းမှ ဖမ်းဆီးထားကြောင်း သိရပါသည်။
