APM၊ ဒီဇမ်ဘာ ၃/၂၀၂၂
ဘူးသီးတောင်မြို့နယ်တွင် ဒီဇမ်ဘာ ၂ ရက်နိ၌ မြီမြှုပ်မိုင်းတလုံးပေါက်ကွဲမှုဖြစ်၍ နွားကျောင်းနီသည့် ဒေသခံ မူဆလင်တယောက် ပြင်းပြင်းထန်ထန် ဒဏ်ရာရဟိလားကြောင်း သိရသည်။
ဒဏ်ရာရလားခသူမှာ ဘူးသီးတောင်မြို့နယ်၊ ဂူတာပြင်အုပ်စု၊ တောင်ရွာ(မူဆလင်)ရွာမှ အဖ ဦးအာမာန် ၏သား ဦးအာဗန်ကိုနီ(၃၅နှစ်)ဖြစ်သည်။
ဦးအာဗန်ကိုနီသည့် ဒီဇမ်ဘာ ၂ ရက်နိ ညဇာ ၄ နာရီအချိန်၌ တောင်ရွာ(မူဆလင်)ရွာ၏ အနောက်ဖက် ၁ မိုင်ခန့် အကွာ တောင်တန်းနားတွင် နွားကျောင်းနီစဉ် မြီမြှုပ်မိုင်းတလုံးကို နင်းမိ၍ ပေါက်ကွဲမှုဖြစ်ပွားခခြင်းဖြစ်သည်။
ယင်းမြီမြှုပ်မိုင်းပေါက်ကွဲမှုကြောင့် ဦးအာဗန်နီကို၏ ခြီထောက်နှစ်ဖက်၌ ဒဏ်ရာပြင်းပြင်းထန်ထန်ရဟိလားခပြီး ဆီးကုသမှုခံယူရန် ဘူးသီးတောင်ဆီးရုံကြီးသို့ ပိုဆောင်ထားရသည်။
အဆိုပါ ဂူတာပြင်အုပ်စု တောင်ရွာ(မူဆလင်)ရွာသည် မြန်မာစစ်တပ်၏ တပ်မ(၂၂) လက်အောက်ခံ ခမရ(၂၀၉)၊ ခမရ(၂၁၀)တပ်ရင်းများမှ တပ်ဖွဲ့ဝင်များ အခြီပြုလုပ်ယှားနီထိုင်ရာ နီရာတခုလေ့ ဖြစ်သည်။
ဘူးသီးတောင်အပါအဝင် ရက္ခိုင်ပြည်မြို့နယ်များ၌ မိုင်းပေါက်ကွဲမှုများ မကြာမကြာ ဖြစ်ပွားနီကာ ဒေသခံ အပြစ်မဲ့ အရပ်သား ပြည်သူ များ၏ ကိုယ်လက်အင်္ဂါ၊ အသက် ဆုံးယှုံးမှုများ၊ လယ်သမားများပိုင်ဆိုင်သည့် ကျွဲ၊ နွားသီဆုံးမှု များ ဆက်တိုက် ဖြစ်ပေါ် လျက် ဟိသည်။
ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော် (ULA/AA) အနီနန့်လေ့ သက်ဆိုင်ရာ ရပ်ကွက်အုပ်ချုပ်ရီး အဖွဲ့ဝင်များ နန့် ပူးပေါင်းပြီး မိုင်းအန္တရာယ်အသိပညာပီး ဟောပြောခြင်း၊ မိုင်းအန္တရာယ်ဟိသော နီရာများသို့မလားလာကတ်ရန် နန့် ယင်းနီရာများကို တားမြစ်နယ်မြီအဖြစ် သတ်မှတ်ခြင်း စသဖြင့် ထိရောက်သောနည်းလမ်းများဖြင့် လုပ်ဆောင် လျက်ဟိပြီး၊ ရက္ခိုင်ပြည်သူများအနီနန့်လေ့ တိတိကျကျလိုက်နာလျက် အထူးသတိထားလားလာကတ်ရန် အကြိမ် ကြိမ် သတိပီး တိုက်တွန်းထားကြောင်းလေ့ သိရသည်။
