
(ရက္ခိုင်ကမ်းရိုးတန်းနန့် ကမ်းလွန်ပင်လယ်ပြင်ရို့တွင် ရံဖန်ရံခါ မိုးသက်လီပြင်းများကျရောက်နိုင်ပြီး လှိုင်းကြီးမည်ဟုဆို)
APM ၊ ဂျူလိုင် ၃၁ / ၂၀၂၃
ဘင်္ဂလားပင်လယ်အော်မြောက်ပိုင်းတွင်ဖြစ်ပေါ်နီသော လီဖီးအားနည်းရပ်ဝန်းသည် နောက် ၁၂ နာရီအတွင်း မုန်းတိုင်ချေအဖြစ်သို့ ရောက်ဟိနိုင်ပြီး ယင်းမုန်တိုင်းချေ အဟိန်ကြောင့် ရက္ခိုင်ကမ်းရိုးတန်းတလျောက်နန့် ကမ်းလွန်ပင်လယ်ပြင်ရို့တွင် ရံဖန်ရံခါ မိုးသက်လီပြင်းများကျရောက်နိုင်ပြီး လှိုင်းကြီးမည်ဟု မိုးလီဝသနန့် ဇလဗေဒ ညွန်ကြားမှု ဦးစီးဌာန (မိုး/ဇလ) က ဒေနိ(ဂျူလိုင် ၃၁ ရက်နိ) ညဇာ ၇ နာရီ တွင်ထုတ်ပြန်သည်။
ထုတ်ပြန်ချက်၌ ” ဒေနိ မြန်မာစံတော်ချိန် ၅ နာရီခွဲအချိန် တိုင်းထွာချက်များအရ ဘင်္ဂလားပင်လယ်အော်မြောက်ပိုင်းတွင် ဖြစ်ပေါ်နီသော အားကောင်းသော လီဖိအားနည်းရပ်ဝန်း (Well Marked Low Pressure Area)သည် ဆက်လက်တည်ဟိနီပါသည်။ အဆိုပါ အားကောင်းသော လီဖိအားနည်းရပ်ဝန်း(Well Marked Low Pressure Area) သည် အနောက်မြောက်ဖက်သို့ ရွိလျားနိုင်ပြီး၊ ပိုမိုအားကောင်းလာနိုင်ကာ နောက် (၁၂)နာရီအတွင်း မုန်တိုင်းချေ(Depression) အဖြစ်သို့ ရောက်ဟိနိုင်သည်ဟု ခန့်မှန်း ရပါသည် ဟုဖော်ပြထားသည်။
ယင်းမုန်တိုင်းချေ အဟိန်ကြောင့် ဒေနိမှ စ၍ ဩဂတ်စ် ၃ ရက်နိအတွင်း ရက္ခိုင်ကမ်းရိုးတန်း အပါအဝင်မြန်မာ့ ကမ်းရိုးတန်း တလျှောက်နန့်ကမ်းလွန်ပင်လယ်ပြင်ရို့တွင် ရံဖန်ရံခါ မိုးသက်လီပြင်းများ ကျရောက်ပြီး လှိုင်းကြီးနိုင်ကြောင်း၊ မိုးသက် လီပြင်းကျစဉ် ရီပြင်/မြီပြင်လီသည် တနာရီလျှင် ၄၅ မိုင်အထိ တိုက်ခတ်နိုင်ပါကြောင်းနန့် လှိုင်းအမြင့်မှာလေ့ ၁၀ ပေမှ ၁၃ ပေလောက်ဟိနိုင်ကြောင်း ထုတ်ပြန်ချက်တွင် ဖော်ပြသည်။
ယင်းအပြင် ဒေနိမှဩဂတ်စ် ၃ ရက်နိအတွင်း ရက္ခိုင်ပြည်၊ ကရင်ပြည်၊ မွန်ပြည် ရို့တွင် ဒေသအလိုက် နီရာကွက်၍ မိုးကြီးနိုင်သည်ဟုလေ့ မိုး/ဇလ က ဆိုသည်။
အလားတူ အားကောင်းသောလီဖိအားနည်းရပ်ဝန်း၏အဟိန်ကြောင့် လီပြင်းတိုက်ခတ်ခြင်း၊ မိုးကြီးခြင်း၊ ရုတ်တရက် ရီကြီးခြင်းနန့်တတူ မြီပြိုခြင်းများ ဖြစ်ပေါ်နိုင်၍ ကုန်းမြင့် ဒေသနားတွင် နီထိုင်ကတ်သူများအနီနန့် မြီပြိုမှုအန္တရာယ်ကို လည်းကောင်း၊ မြန်မာ့ကမ်းရိုးတန်း တလျှောက်နန့် မြစ်ချေ၊ ချောင်းချေများအနားတွင် နီထိုင်ကတ်သူများအနီနန့် ရီကြီး၊ ရီလျှံ မှုများ ဖြစ်ပေါ်နိုင်သောကြောင့် ကြိုတင်သတိပြုနီထိုင်ကတ်ရန်နန့် ပြည်တွင်းလီကြောင်း ပျံသန်းရီးနန့် ရက္ခိုင်ကမ်းရိုးတန်းအပါအဝင် မြန်မာ့ကမ်းရိုးတန်းတလျှောက်နန့်ကမ်းလွန်ပင်လယ်ပြင်ရို့ဟိ ကမ်းနား၊ ကမ်းဝီး ငါးဖမ်းဘုတ်များ၊ သင်္ဘောများအနနီနန့်လေ့ကြိုတင်သတိပြုနိုင်ကတ်ပါရန် မိုး/ဇလက အသိပီးနှိုးဆော်ထားသည်။
