APM ၊ မာ့ချ် ၃၁ /၂၀၂၄
ဒေနိ မာ့ချ် ၃၁ရက်နိ၊ ညည့် ၈ နာရီလောက်က မြေပုံမြို့ နယ်၊ ကမ်းထောင်းကြီးမြို့ကို အကြမ်းဖက်စစ်ကောင်စီက ဂျက်ဖိုက်တာနန့်ဗုံးကြဲတိုက်ခိုက်ရာ စာသင်ကျောင်းတကျောင်းနန့် လူနီအိမ် ၄ ဆောင် ပြာကျလားကြောင်း သိရပါရေ။
မီးလောင်ပြာကျလားရေ စာသင်ကျောင်းကတော့ ကမ်းထောင်း ကြီးမြို့၊ ရခိုင်ကုန်းရပ်ကွက်ဟိ အခြီခံပညာ (မူလွန်)ကျောင်းဖြစ်ပြီးကေ နီအိမ်တိမာလည်း ယင်းအနားက ဦးစောတင်မောင်၊ ဦးနုမောင်ဦး၊ ဦးမောင်ကြီးနန့် ဦးကျော်ဘု ရို့၏ နီအိမ်တိဖြစ်ကတ်ပါရေ။
မာ့ချ် ၃၁ ရက်နိ၊ ညည့် ၈ နာရီအချိန်လောက်မာ အကြမ်း ဖက်စစ်ကောင်စီတပ်စွာ ကမ်းထောင်းကြီးမြို့ကို ဂျက်ဖိုက်တာတစီးနန့်ဗုံးကြဲခရေလို့ မြို့ခံတိက ပြောပါရေ။
ယင်းဗုံးစွာ ရခိုင်ကုန်းရပ်ကွက်ဟိ ဦးမောင်ခင်မြင့်၏ ရီခဲစက်ဒိုင်နောက်နားမာ ကျရောက်ပေါက်ကွဲခပြီးကေ ယင်းအနားမာဟိရေ အခြီခံပညာ(မူလွန်)ကျောင်း မီးလောင် ပျက်စီးလားရေလို့ ဆိုပါရေ။
ယင်းအပြင် ဦးစောတင်မောင်၊ ဦးနုမောင်ဦး၊ ဦးမောင် ကြီးနန့် ဦးကျော်ဘုရို့၏ နီအိမ်တိ မီးလောင်ပြာကျလားခရေလို့ ထပ်မံသိဟိရပါရေ။
ကုန်ခရေ မာ့ချ် ၂၉ ရက်နိကလည်း ကမ်းထောင်းကြီးမြို့ကို အကြမ်းဖက်စစ်ကောင်စီက ဗုံးကြဲတိုက်ခိုက်ခလို့ ဒေသခံ ၆ယောက်ထိခိုက်ဒဏ်ရာ ရလားခပါသိမ့်ရေ။
အလားတူ မာ့ချ်၂၄ ရက်နိကလည်း ကမ်းထောင်းကြီးမြို့ ဆီးရုံကို အကြမ်းဖက်ကောင်စီတပ်က ဗုံးကြဲတိုက်ခိုက်ခလို့ ကမ်းထောင်းကြီးဆီးရုံ ပျက်စီးလားခပြီးကေ အမျိုးသမီးတယောက်လည်း ပြင်းထန် ဒဏ်ရာရလားခရေလို့ သိဟိရပါရေ။
