(နီအိမ်တိကိုလည်း ဖောက်ထွင်းပနာ ပစ္စည်းတိကို ခိုးယူလား)
APM ၊ မေ ၃၀ / ၂၀၂၄
မေ ၂၉ ရက်နိ၊ နိခင်းက စစ်ကောင်စီနန့် စစ်ကောင်စီလက်ကိုင်တုတ် မူဆလင်လက်နက်ကိုင်တိစွာ မောင်တောမြို့၊ ကညင်တန်းရပ်ကွက်၊အောင်မြီဗောဓိရွာကို ဝင်ရောက်စီးနင်းပြီးကေ၊ ရွာသား ၅ ယောက်ကို မတရားဖမ်းဆီးလားရေပိုင်၊ ရွာထဲက နီအိမ်တိကိုလည်း ဖောက်ထွင်းပနာ ပစ္စည်းတိ ခိုးယူလားရေလို့ သိရပါရေ။
ဖမ်းဆီးခံရရေလူတိစွာ မောင်တောမြို့၊ကညင်တန်းရပ်ကွက်၊ အောင်မြေဗောဓိရွာက ဦးထွန်းလှိုင်(ခ)ဒေါင်းပြောက် (၄၀ နှစ်)၊ ဦးမြတ်နိုင်(၃၁ နှစ်)နန့် ကိုမောင်မောင်ချေအပါအဝင် အခြားဒေသခံ ၂ ယောက်ရို့ဖြစ်ကတ်ပါရေ။
မေ ၂၉ ရက်နိ၊နိခင်းက မြို့သူကြီး၊နခခ(၅)မာ အခြီပြုနီရေ စစ်ကောင်စီတပ်ဖွဲ့၀င်တိနန့်၎င်းရို့၏ လက်ကိုင်တုတ်မူဆလင်လက်နက်ကိုင် ပူးပေါင်းအင်အား (၁၀၀)ယောက်စွာ မောင်တောမြို့၊ကညင်တန်းရပ်ကွက်၊အောင်မြီဗောဓိရွာကို ဝင်ရောက်စီးနင်းပြီးကေ ၊ရွာဟိ ဒေသခံ ၅ ယောက်ကို ဖမ်းဆီးလားခရေလို့ ဒေသခံတိက ပြောပါရေ။
ယင်းအပြင် စစ်ကောင်စီနန့် လက်ကိုင်တုတ် မူဆလင်လက်နက်ကိုင်တိစွာ အောင်မြီဗောဓိရွာဟိ နီအိမ်တိကိုလည်း ဖောက်ထွင်းပြီးကေ ပစ္စည်းတိ ခိုးယူလားရေလို့ ဆိုပါရေ။
ကုန်ခရေ မေ ၂၇ ရက်နိကလည်း ယင်း နခခ(၅) က တပ်ဖွဲ့ဝင်တိနန့် မူဆလင်လက်နက်ကိုင်တိစွာ မောင်တောမြို့နယ်၊ ဝိမလရွာနန့် မြို့ဦးရွာရို့ကို ဝရုန်းသုန်းကား စီးနင်းဝင်ရောက်လာပြီးကေ ရက္ခိုင်လူမျိုး ၅ ယောက်၊ ဟိန္ဒူအယောက် ၄၀ နန့် မူဆလင်အယောက် ၃၀ ရို့ကို မတရား ဖမ်းဆီးထားခသိမ့်ကြောင်းလည်း သိရပါရေ။
