APM ၊ မေ ၃ / ၂၀၂၄
ဧပြီ ၂၇ ရက်နိမာ ARSA အကြမ်းဖက်အဖွဲ့ဖမ်းယူလားရေ မောင်တောမြို့က ဟိန္ဒူလူမျိုးတယောက်နန့် ရခိုင်လူမျိုးတယောက်ကို တပတ်ခန့်အကြာလက်ဟိအချိန်ထိ သတင်းအစအနမရသိမ့်လို့ သိရပါရေ။
ARSA အကြမ်းဖက်အဖွဲ့ဖမ်းယူလားခရေလူနှစ်ယောက်ကတော့ မောင်တောမြို့၊ အမှတ် (၄) ရပ်ကွက် က ဦးတော်ပေါန်နန့် ဦးဝင်းထွန်း ရို့ဖြစ်ကတ်ပါရေ။
ဦးတော်ပေါန်နန့် ဦးဝင်းထွန်းရို့စွာ ဧပြီ ၂၇ ရက်နိမာ မောင်တောမြို့ထဲကနီ မင်္ဂလာကြီးရွာဖက်သို့ ဆိုင်ကယ်တစီးနန့် ထွက်လာကတ်တေခါ ရွှီစားရွာနန့် ကျောက်လှီကားရွာကြားမာ ARSA အကြမ်းဖက်အဖွဲ့ဝင် ၃ ယောက်က အကြမ်းဖက်ဖမ်းယူလားရေလို့ မျက်မြင်ဒေသခံတိကပြောပါရေ။
လက်ဟိမာ ၇ ရက်ကြာလာကေလေ့ သူရို့နှစ်ယောက်နန့်ပတ်သက်လို့ မိသားစုဝင်တိကို တစုံတရာ ဆက်သွယ်လာစွာမဟိသိမ့်ပိုင် သတင်းအစအနလည်း မရသိမ့်လို့ မိသားစုနန့် နီးစပ်သူတယောက်က ဆိုပါရေ။
ARSA အကြမ်းဖက်အဖွဲ့စွာ မောင်တောနန့် ဘူးသီးတောင်မြို့နယ်အတွင်းမာ ဒေသခံလမ်းလားလမ်းလာတိကို ဖမ်းဆီးသတ်ဖြတ်၊ လုယက်၊ ဒါးပြတိုက် စရေ အကြမ်း ဖက်လုပ်ရပ်တိကို ဆက်တိုက်ကျူးလွန်လို့ ဟိနီပါရေ။
