APM၊ ဧပြီ ၃ / ၂၀၂၄
စစ်တွေမာ မာ့ချ် ၃၀ ရက်နိ၊ ညည့်အချိန် အကြမ်းဖက်စစ်ကောင်စီ၏ ရည်ရွယ်ချက်ဟိဟိ ထောင်ထားရေ မိုင်းကို နင်းမိလို့ အပြစ်မဲ့ပြည်သူတယောက် ခြီထောက်နှစ်ဖက်စလုံး ပြတ်ထွက်လားရေလို့ သိရပါရေ။
ခြီနှစ်ဖက်ပြတ်ထွက် ဒဏ်ရာရလားလူမာ စစ်တွေမြို့နယ်၊ ကျက်တောပြင်ရွာက ကိုနေထွန်းမင်း (၂၇ နှစ်)ဖြစ်ပါရေ။
ကိုနေထွန်းမင်းစွာ မာ့ချ် ၃၀ ရက်နိ၊ ညည့် ၁၁ နာရီခွဲလောက်မာ ရသေ့တောင်မြို့နယ်၊ အငူမော်ဖက်ကနီ စစ်တွေသို့ ဟွန်ဒါနန့် လာရာ၊ စစ်တွေမြို့နယ်၊ အောင်ဒိုင် ချောင်းဝသို့အရောက် ကမ်းထက်သို့တက်စဉ် မိုင်း ၂ လုံးကို တပြိုင်တည်း နင်းမိ ပေါက်ကွဲလားစွာလို့ မျက်မြင်ဒေသခံတိက ပြောပါရေ။
ယင်းမိုင်းပေါက်ကွဲမှုကြောင့် ကိုနေထွန်းမင်းမာ ခြီထောက်နှစ်ဖက်စလုံးပြတ်ထွက် လားရေလို့ ဆိုပါရေ။
ယင်းအောင်ဒိုင်ချောင်းဝနားမာ အကြမ်းဖက်စစ်ကောင်စီတပ်ကယာယီ အခြီချ တပ်စွဲလို့ဟိနီရာ အဆိုပါ မိုင်းပေါက်ကွဲသံကြောင့် အပါးဟပ်စပ်ဟိ အကြမ်းဖက် စစ်ကောင်စီတပ်ဖွဲ့ဝင်တိစွာ ကြောက်လန့်တကြား နန့် အနားပတ်ဝန်းကျင်တိကို သီနတ်နန့် ရမ်းကား ပစ်ခတ်ခပါသိမ့်ရေ။
လက်ဟိ ကိုနေထွန်းမင်းစွာ အရေးပေါ် ဆီးကုသမှုခံယူနီရရေလို့ သိရပါရေ။
