APM ၊ ဧပြီ ၃ / ၂၀၂၃
ရီးရဲတိုက်စစ်မှူးကာရင်ဘန်ဇီမာသည် ဧပြီ ၂ ရက်နိညည့်၌ ကဇတ်ခသည့် ဗယ်လာဒိုလစ်နန့်ပွဲစဉ်တွင် ၇ နစ် မိနစ်တွင် ဟက်ထရစ်သွင်းယူနိုင်ခသည့်အတွက် အယင်က ရီးရဲအသင်း၌ ၇ နစ်မိနစ်အကြာ ဟက်ထရစ်သွင်းယူထားခသည့် တိုက်စစ်မှူး ခရစ္စတီယာနိုရော်နယ်ဒို၏ စံချိန်ကိုလိုက်မှီခကြောင်းသိရသည်။
ယင်းပွဲတွင် တိုက်စစ်မှူးဘန်ဇီမာသည် ပွဲချိန် ၂၉ မိနစ်၊ ၃၂ မိနစ်နန့် ၃၆ မိနစ်ရို့တွင် သုံးဂိုးသွင်းယူနိုင်ခပြီး တခြားဂိုးများကို တော့ ရိုဒရီဂို၊ အဆန်စီယို နန့် ဗက်ဇ်ကေးဇ်ရို့က သွင်းယူပီးခ၍ အိမ်ကွင်းတွင် ၆ ဂိုး ဂိုးမဟိနန့် အနိုင်ရဟိခသည်။
ယင်းအပြင် ဘန်ဇီမာ၏ ၇ နစ်မိနစ် ဟက်ထရစ်သွင်းဂိုးသည် ၁၉၉၂ ခုနှစ်၊ ဧပြီလက အက်စပန်ညိုကို ၇ ဂိုးပြတ်ဖြင့် အနိုင်ရ ဟိခသည့် ဖာနန်ဒိုဟီရိုးရို၏ ခြောက်မိနစ် ဟက်ထရစ်သွင်းဂိုး၏နောက် စပိန်လာလီဂါတွင် အယင်မြန်ဆုံး ဟက်ထရစ်ဖြစ် လာခကြောင်းလေ့ သိရသည်။
အသက် ၃၅ နှစ်အရွယ် Ballon d’Or ဆုသျှင် ပြင်သစ်တိုက်စစ်မှူး ဘန်ဇီမာသည် လက်ဟိရီးရဲနည်းပြ အန်ဆယ်လော့တီ၏ လမ်းညွှန်မှုအောက်တွင် သွင်းဂိုး ၁၁၂ ဂိုးအထိ သွင်းယူထားသည်။
ရီးရဲမက်ဒရစ်အသင်းသည် လာလီဂါအမှတ်ပီးဇယား၌ ဒုတိယနီရာတွင်ရပ်တည်နီပြီး အမှတ်ပီးဇယားကိုဦးဆောင်နီသည့် ဘာစီလိုနာအသင်းနန့် ၁၂ မှတ်ကွာဟနီသည်။
Source – Karim Benzema emulated Cristiano Ronaldo as his seven-minute hat-trick set Real Madrid on their way to a 6-0 win over Real Valladolid.
Photo – EPA
