APM၊နိုဗမ်ဘာ ၃/၂၀၂၃
ဒေရက်ပိုင်းအတွင်း ကျောက်ဖြူ မြို့နယ် ဇင်ချောင်းတိုက်နယ်မာ စစ်ကောင်စီတပ်က စစ်ရီးလှုပ်ယှားမှုတိ အယင်ကထက် သိသိသာသာ ပိုလုပ်လာကြောင်း သိရပါရေ။
ဇင်ချောင်းရဲကင်းစခန်းမာ အခြီပြုနီရေ စစ်ကောင်စီတပ်ဖွဲ့ဝင်တိက ဒေရက်ပိုင်းအတွင်းမာ ဇင်ချောင်းတိုက်နယ်တဝန်း လှည့်လည်လားလာပနာ ဒေသခံပြည်သူတိကို စစ်ဆီးစွာ၊ နီအိမ်တိကို ဝင်ရောက်စုံစမ်းစွာ နိစဉ်ရက်ဆက် ပြုလုပ်လာပါရေ။
ဒေနိ (နိုဗမ်ဘာ ၃ ရက်နိ) နိခင်း ၁ နာရီလောက်က ယင်းရဲကင်းစခန်းက စစ်ကောင်စီတပ်ဖွဲ့ဝင် ၂၀ လောက်စွာ ဇင်ချောင်းလမ်းမကြီးတလျှောက် လက်နက်အပြည့်အစုံနန့် အင်အားပြလားလာနီကတ်တေပိုင် ဇင်ချောင်း တိုက်နယ်ဆီးရုံးရှိမာလည်း စစ်ကောင်စီတပ်သား ၁၀ လောက်က လမ်းလား၊လမ်းလာ ဒေသခံတိကို စီးဆီးမှုတိပြုလုပ်နီရေလို့ ဒေသခံတိက ပြောပါရေ။
ဒေနိ မိုးထ ၁၀ နာရီလောက်ကလည်း ကျောက်ဖြူမြို့မတိုက်နယ်က စစ်ကောင်စီ အင်အား ၆၀ လောက်စွာ လက်နက်အပြည့်အစုံနန့် စနဲဖက်သို့လားခရေလို့ သိရပါရေ။
နိုဗမ်ဘာ ၂ ရက်နိကလည်း ဇင်ချောင်းစခန်းက စစ်ကောင်စီတပ်ဖွဲ့ဝင် ၂၀ နန့် ရဲတပ်ဖွဲ့ဝင် ၁၀ လောက်စွာ လေးတောင်လမ်းမကြီးအတိုင်း စစ်ကြောင်းလျှောက်လားလာနီငတ်ပနာ လမ်းတလျှောက်ဟိ ခရီးလားပြည်သူတိ၏ ဆိုင်ကယ်တိစစ်ဆီးမှုတိ လုပ်ခကြောင်း သိရပါရေ။
အဂုပိုင် စစ်ကောင်စီက စစ်ရီးလှုပ်ယှားစွာရေ အယင်ကထက် သိသိသာသာ များလာနီလို့ ဒေသခံတိအကြား စိုးရိမ်မှုတိမြင့်တက်နီကတ်ကြောင်း သိဟိရပါရေ။
