APM၊ နိုဗမ်ဘာ ၃ / ၂၀၂၃
တအာင်းပြည်နယ်မာ ဖော်ဆောင်နီရေ ၁၀၂၇ စစ်ဆင်ရီးအတွင်း ဒေနိ(နိုဗမ်ဘာ ၃ ရက်နိ)မိုးထပိုင်းက စစ်ကောင်စီတပ်စခန်း (၃) ခုထက်မနည်းကို TNLA သိမ်းပိုက်လိုက်ကြောင်း ပလောင်ပြည်နယ်လွတ်မြောက်ရီးတပ်ဦး/တအာင်းအမျိုး သားလွတ်မြောက်ရီးတပ်မတော်(PSLF/TNLA)က သတင်းထုတ်ပြန်ပါရေ။
ထုတ်ပြန်ချက်အရ ဒေနိမိုးထ ၆ နာရီ ၅၅ မိနစ်မာ ၁၀၂၇ စစ်ဆင်ရီးအဖြစ်၊ တပ်မဟာ (၁)စစ်ဒေသ၊ နမ့်ခမ်းမြို့နန့် မန့်ဝိန်းကြီးကြား ဆက်သွယ်ထားရေ ရွှီလီကြိုးတန်းထားဟိ စစ်ကောင်စီတပ်စခန်းကို PSLF/TNLA တိုက်ခိုက်သိမ်းပိုက်နိုင်ခပြီးကေ လက်နက် (၄) လက်၊ 60MM ဗုံးသီး(၃၀)လုံး၊ RPG အသီး (၈)လုံး၊ လက်ပစ်ဗုံး (၅၀) လုံး၊ ကျည်ဆံများစွာနန့် စစ်အသုံးအဆောင်ပစ္စည်းတိ သိမ်းဆည်းရမိခရေလို့ သိရပါရေ။
ယင်းရွှီလီကြိုးတန်းထားဟိ စစ်ကောင်စီတပ်စခန်းကို တိုက်ခိုက်သိမ်းပိုက်ချိန်မာ စစ်ကောင်စီဖက်က ဂျက်ဖိုက်တာနန့် (၃)ကြိမ် လာရောက်ပစ်ကူပီးခသိမ့်ရေလို့လည်း PSLF/TNLA ကဆိုပါရေ။
ယင်းနည်းတူ ဒေနိမိုးထ ၅ နာရီမာလည်း တပ်မဟာ (၃) စစ်ဒေသ၊ မန်တုံမြို့ဟိ စစ်ကောင်စီ ရဲစခန်း၊ စစ်ကောင်စီတပ်နန့် ပြည်သူ့စစ် ပူးပေါင်းစခန်းရို့ကို PSLF/TNLA က တပြိုင်တည်း လားရောက်တိုက်ခိုက်သိမ်းပိုက်ခပါရေ။
တပ်မဟာ(၂)စစ်ဒေသ နောင်ချိုမြို့နယ်ဟိ စစ်ကောင်စီ ၏ ကွန်ခါတပ်စခန်းကို ဒေနိမိုးထ ၄ နာရီလောက်မာ PSLF/TNLA က ချေမှုန်းတိုက်ခိုက်သိမ်းပိုက်ခကြောင်းလည်း ထုတ်ပြန်ချက်က ဖော်ပြပါရေ။
စစ်ကောင်စီတပ်စွာ ဒေနိမိုးထစောစောက တိုက်ပွဲဖြစ်တေနီရာနန့်လုံးဝမသက်ဆိုင်၊ လက်နက်ကိုင်အဖွဲ့အစည်းလုံးဝမဟိရေ နမ့်ခမ်းမြို့နယ်၊ လွယ်အင်ကျေးရွာကို လက်နက်ကြီးနန့် ပစ်ခတ်တိုက်ခိုက်တေအတွက် အချေတယောက် ကျည်ထိမှန်လားခပြီးကေ ဘုန်းကြီးကျောင်းလည်း ထိမှန်ပျက်စီးလားခပါရေ။
အလားတူ နိုဗမ်ဘာ ၂ ရက်နိ ညည့်သန်းခေါင် ၁၂ နာရီ ၃၀ မိနစ်မာ နောင်ချိုမြို့နယ်ဟိ၊ ဟိုခိုကျေးရွာကိုလည်း စစ်ကောင်စီတပ်က ဂျက်ဖိုက်တာနန့် ဖျက်အားပြင်း ပေါင် (၅၀၀) ဗုံးအသုံးပြု ပစ်ခတ်တိုက်ခိုက်ခလို့ နိအိမ် ၃ လုံး ပျက်စီးလားခရကြောင်းလည်း PSLF/TNLA၏ ထုတ်ပြန်ချက်မာ ဖော်ပြထားပါရေ။
