APM ၊ ဧပြီ ၂၉ / ၂၀၂၃
မြီနီရာအခက်အခဲကြောင့် ကျောက်တော် ဝါးတောင်စစ်ဖီးယှောင်စခန်းကို နီရာအသစ်သို့ ပြောင်းရွှိတည်ဆောက် လိုက်ရကြောင်း သိရသည်။
ဝါးတောင်စစ်ဖီးယှောင်စခန်းတွင် အိမ်ထောင်စု ၆၆ ဦး၊ လူဦးရေ ၃၆၁ ယောက် ခိုလှုံလျက်ဟိပြီး ကုန်ခ သည့် ၂၀၁၈/၂၀၁၉ ခုနှစ် တိုက်ပွဲကာလပင် ကျောက်တော်မြို့ နယ် ခမောင်း၊ သိန်းချောင်း၊ တဲဝ၊ လင် ကွိ၊ ပညာကြီး၊ င/စရိုင်းကိုင်း ၊ ချင်းမဝန် တောင်း၊ ကင်ဘိ ကျေးရွာစသည့်ကျေးရွာများမှ အိုးအိမ်စွန့်ခွာ တိမ်းယှောင် လာကတ်ရသူများ ဖြစ်ကတ်သည်။
ယင်းစစ်ဖီးယှောင်စခန်းတည်ဆောက်ထားသည့် မူလမြီနီရာသည် ငှားထားခြင်းဖြစ်ပြီး လက်ဟိ တွင် သက်တမ်း ပြည့်လားကာ ပိုင်သျှင်က ဆက်မငှား၍ နောက်နီရာသစ်တခု ငှားကာ ပြောင်းရွှိတည်ဆောက်နီရ စစ်ဖီးယှောင် များက ပြောသည်။
ဒေဂုပြောင်းရွှိတည်ဆောက်နီသော နီရာမှာ တောင်မင်းကုလားစစ်ဖီးယှောင်စခန်းနန့် ပေ ၈၀၀ အကွာတွင် ဟိပြီး မြီနီရာ တနှစ်ငှား ရမ်းခ ငွေကျပ်၂၄ သိန်းပီးဆောင်ရကာ အိမ်ထောင်စုတစုကို ငွေကျပ် ၃၀၀၀၀ စီကောက်ခံလျက် စစ်ဖီးယှောင်များ ကိုယ်ထူကိုယ်ထငှားရမ်းထားရသည်ဟုဆိုသည်။
လက်ဟိတွင်လေ့ အဆိုပါ ဝါးတောင်စစ်ဖီးယှောင်စခန်းမှ စစ်ဖီးယှောင်များသည် မြီနီရာသစ်၌ အဆောင်များကို ကိုယ်ထူ ကိုယ်ထ ဆောက်လုပ်နီကတ်ရပြီး သစ်၊ဝါးနန့်အမိုးအကာများ အကူအညီလိုအပ်နီသည့်အပြင် စားဝတ် နီရီးလေ့ အခက်အခဲ ဖြစ်နီကတ်ရ ကြောင်း သိဟိရပါသည်။
