APM ၊ ဧပြီ ၂၉ / ၂၀၂၃
မောင်တောမြို့နယ်တွင် ဒေနိ(ဧပြီ ၂၉ ရက်နိ) မိုးထက ဆင်တကောင်သီဆုံးလျက် တွိဟိခရကြောင်း သိရသည်။
ယင်း သီဆုံးနီသည့်ဆင်ကို မောင်တောမြို့နယ် တောင်ပိုင်း အောင်သုခကျေးရွာနား၌ ဒေနိ မိုးထ ၇ နာရီခွဲက ဒေသခံရွားတယောက် တွိခရခြင်းဖြစ်ပြီး ဆင်၏ ကိုယ်ခန္ဓာ၌ ဒဏ်ရာဒဏ်ချက်များတော့ မတွိရဟုဆိုသည်။
ဒေသခံများကတော့ အဆိုပါ ဆင်သည်အသက်အရွယ်ကြီးလာသည့်အပြင် တောတောင်ထဲဟိ မြောင်များတွင်လေ့ ရီခမ်းခြောက်လာ၍ ရီသောက်ရန်ဆင်း လာစဉ် သီဆုံးလားခြင်းဖြစ်နိုင်သည်ဟု ခန့်မှန်းပြောဆိုသည်။
လက်ဟိတွင် ယင်းဆင်အား ဒေသခံများနန့် သက်ဆိုင်ရာတာဝန်ဟိသူများပူးပေါင်း၍ မြီမြှုပ်သင်္ဂြိုလ်လိုက်ကြောင်း သိရသည်။
ရက္ခိုင်ပြည်တွင် လက်ဟိ၌ နိအပူချိန်မြင့်တက်လာ၍ တောတောင်တန်းများဟိ မြောင်များနန့် သောက်သုံးရီကန် များ ရီခမ်းခြောက်လားကာ ရီယှားပါးမှုကို ဆိုးဆိုးဝါးဝါးရင်ဆိုင် နီကတ်ရပြီးကျွဲ၊ နွားအပါအဝင်တိရိစ္ဆာန်များ သီဆုံးမှုဖြစ်ပေါ် လျက်ဟိကြောင်း သိဟိရပါသည်။
