
APM၊ ဒီဇမ်ဘာ ၂၉ /၂၀၂၃
ဒေနိ ( ဒီဇမ်ဘာ ၂၉ ရက်နိ) နိခင်း ၂ နာရီကျော်လောက်က မြောက်ဦးမြို့မာ အကြမ်းဖက်စစ်ကောင်စီတပ်ဖွဲ့ဝင်တိ၏ ရည်ရွယ်ချက်ဟိဟိလက်နက်ချေနန့် ပစ်ခတ်မှုကြောင့် နောက်ထပ်မြို့ခံတယောက်ပြင်းပြင်းထန်ထန် ဒဏ်ရာရဟိလားကြောင်း သိရပါရေ။
ဒဏ်ရာရလားလူမာ မြောက်ဦးမြို့၊ ဝသဲရပ်ကွက်က ဦးကျန်မောင် (၇၀ နှစ်) ဖြစ်ပါရေ။
ဦးကျန်မောင်စွာ ဒေနိ၊ နိခင်း ၂ နာရီကျော်လောက်မာ ချောင်းသစ်ရွာဟိ ဆွေမျိုးတိဘားက ဆန်ယူလို့ပြန်လာရာ ကောင်းပုံပြင်လမ်းနားဟိ မြောက်ဦးအခြီစိုက် အကြမ်းဖက်စစ်ကောင်စီလက်အောက်ခံ အမှတ် (၃၁) ရဲစခန်းက တပ်ဖွဲ့ဝင်တိ လက်နက်ချေနန့် လိုက်ပစ်ခကတ်စွာလို့မျက်မြင်ဒေသခံတိကပြောပါရေ။
ယင်းလက်နက်ချေကျည်စွာ ဦးကျန်မောင်၏ ဦးဂေါင်းကို ချော်ကျကျခပြီးကေ ဒဏ်ရာပြင်းပြင်းထန်ထန် ရလားရေလို့ ဆိုပါရေ။
လက်ဟိ ဦးကျန်မောင်စွာ တိန်ညိုတိုက်နယ်ဆီးရုံမာ အရေးပေါ်ပဆီးကုသမူခံယူလျှက်ဟိပါရေ။
ရက္ခိုင်မာ ရက္ခိုင့်တပ်တော်AAနန့် စစ်ကောင်စီတပ်ရို့တိုက်ပွဲဖြစ်ပြီးနောက်ပိုင်း စစ်ကောင်စီတပ်က အရပ်သား ပြည်သူတိနီထိုင်ရေ ရပ်ရွာတိကို လက်နက်ကြီး၊ လက်နက်ချေတိနန့် ရည်ရွယ်ချက်ဟိဟိ ပစ်ခတ်တိုက်ခိုက်နီပါရေ။
တချိန်တည်းမာ ယင်းလက်နက်ကြီး၊ လက်နက်ချေ ကျည်တိကြောင့်လည်း အရပ်သားပြည်သူတိ သီဆုံး၊ ထိခိုက်ဒဏ်ရာရမှု၊ အိုးအိမ်အဆောက်အအုံပျက်စီဆုံးယှုံးမှုတိ တရက်ထက်တရက် ပိုလို့ များပြားလာနီပါရေ။
