APM၊ နိုဗမ်ဘာ၂၉ / ၂၀၂၄
နိုဗမ်ဘာ ၂၈ ရက်နိ၊မိုးထပိုင်းမာ အကြမ်းဖက်စစ်ကောင်စီ ပစ်ခတ်လိုက်တေ လက်နက်ကြီးကျည် ကျရောက်ပေါက်ကွဲမှုကြောင့် မောင်တောမြို့၊ ကညင်တန်းရပ်ကွက်က လူနီအိမ် ၃ ဆောင် မီးလောင်ပြာကျလားရေလို့ ဒေသခံတိက ပြောပါရေ။
နိုဗမ်ဘာ ၂၈ ရက်နိ၊ မိုးထ ၁၀ နာရီ ၅၀ မိနစ်လောက်မာ မောင်တောမြို့၊မြို့သူကြီး၊နခခ(၅)က စစ်ကောင်စီတပ်ဖွဲ့ဝင်တိ ပစ်ခတ်လိုက်တေ လက်နက်ကြီးကျည်တိစွာ ကညင်တန်းရပ်ကွက်အတွင်း ကျရောက် ပေါက်ကွဲခရေလို့ ဒေသခံတယောက်က Arakan Princess Media ကို ပြောပါရေ။
ယင်းကျည်ကျရောက်ပေါက်ကွဲခလို့ ကညင်တန်းရပ်ကွက်ဟိ နီအိမ် ၃ ဆောင်မာ မီးလောင်ပြာကျလားရေလို့ ဆိုပါရေ။
လက်ဟိမာ အာရက္ခတပ်တော်စွာ မောင်တောမြို့မာ တခုတည်းကျန်ဟိနီသိမ့်ရေ အကြမ်းဖက်စစ်ကောင်စီ၏ နခခ(၅)စခန်းကို အပြီးသတ်သိမ်းပိုက်နိုင်ရီးအတွက် ဆက်လက် ထိုးစစ်ဆင်တိုက်ခိုက်လို့ဟိနီပါရေ။
အကြမ်းဖက်စစ်ကောင်စီဖက်ကတော့ ယင်းနခခ (၅) စခန်း မကျဆုံးစီရီးအတွက် အပါးဟပ်စပ်က ဒေသခံပြည်သူရို့နီထိုင်ရာ ရပ်ရွာတိ လီကြောင်း၊ လက်နက်ကြီးတိနန့် နိစဉ်နိတိုင်း ပစ်ခတ်တိုက်ခိုက်လို့ဟိကြောင်း သိဟိရပါရေ။
