APM ၊ မေ ၂၈ / ၂၀၂၃
မုန်တိုင်းကြောင့် ရက္ခိုင်ပြည်အနှံ့ ထိခိုက်ပျက်စီးမှုများပြားခရပြီးနောက် ရက္ခိုင်-ဘင်္ဂလားဒေ့ချ်နယ်စပ်ကုန်သွယ်ရီး ပြန်လည်ပတ်ရန် အချိန်တခုထိ ကြန့်ကြာနိုင်ကြောင်း ရက္ခိုင်ကုန်သည်များ၏ ပြောကြားချက်အရ သိရသည်။
အင်အားပြင်း Mocha ဆိုင်ကလုန်းမုန်တိုင်းသည် မေ ၁၄ ရက်နိ၌ စစ်တွေမြို့အနားက ဖြတ်ကျော်ဝင်ရောက် ခပြီးနောက် ရက္ခိုင်ပြည်မြို့နယ်အများစုတွင် နီအိမ် ၊ သာသနိကအဆောက်အအုံနန့် စာသင်ကျောင်းအပါအဝင် အဆောက်အအုံ အများ အပြား ထိခိုက်ပျက်စီးဆုံးယှုံးခရသည်။
ယင်းပျက်စီးမှုများတွင် စီးပွားရီးလုပ်ငန်းသျှင်များ သိုလှောင်ထားသည့် ကုန်ပစ္စည်းဂိုဒေါင်များ၊ စီးပွားရီးဆိုင်ရာ အဆောက် အအုံများ နန့် ငါး/ပုဇွန်မွီးမြူရီးဆိုင်ရာ တာတမံများလေ့ ပါဝင်သည်။
ယင်းကြောင့် ကုန်ပစ္စည်းများပျက်စီးလားရကာ လက်ဟိ တင်ပို့စရာ ကုန်ပစ္စည်းမဟိဖြစ်နီကတ်ရ ကြောင်း ရက္ခိုင်ကုန်သည် များကပြော သည်။
ယင်းအပြင် အဆိုပါပျက်စီးလားသည့် စီးပွားရီး ဆိုင်ရာအဆောက်အအုံ များ နန့် ငါး/ပုဇွန်မွီးမြူရီးဆိုင်ရာ တာတမံများကို ပြန် ဆောက်ရန်လေ့ အချိန်ယူရနိုင်၍ နယ်စပ်ကုန်သွယ်ရီး ပြန်လည်ပတ်ရန် အချိန်အတိုင်း အတာတခုထိ ကြန့်ကြာလား နိုင်သည်ဟုဆိုသည်။
တခြားနီရာများက တဆင့်ခံဝယ်ယူတင်ပို့နီကတ်သည့် ကုန်သည်များမှာလေ့ ကုန်ပစ္စည်းများဈီးနှုးန်မြင့်တက်နီ၍ ဝယ်ယူ မှုဈီးမကိုက် ဟု သိရသည်။
ရက္ခိုင်ပြည်ဟိ မောင်တော နန့် စစ်တွေ နယ်စပ်ကုန်သွယ်ရီးစခန်းများမှ ဘင်္ဂလားဒေ့ချ်နိုင်ငံသို့ ရီထွက်ကုန်ပစ္စည်း၊ လယ်ယာသုံးပစ္စည်းနန့် အခြီခံ စားသောက်ကုန်များကို အဓိက တင်ပို့နီခြင်းဖြစ်ပြီး နယ်စပ်ကုန်သွယ်ရီး လုပ်ငန်း များကို မုန်တိုင်းမတိုက်ခင် တပတ်ခန့်အလိုကပင် ရပ်တန့်ထားခခြင်းဖြစ်ကြောင်း သိဟိရသည်။
