APM ၊ ဒီဇမ်ဘာ ၂၈ / ၂၀၂၃
ဒီဇမ်ဘာ ၂၆ ရက်နိက ရက္ခိုင့်တပ်တော် AA သိမ်းပိုက်လိုက်တေ စစ်ကောင်စီ၏ မြောက်ဦးခရိုင်ရဲစခန်းအတွင်းမာ မြောက်ဦးမြို့ပေါ်ရပ်ကွက်တိနန့်မြို့နားတဝိုက် ရပ်ရွာတိကို စိသားကိုက် ချိန်ရွယ်ထားရေ စစ်ကောင်စီ၏ လက်နက်ကြီး ပစ်မှတ်တိ တွိဟိရကြောင်း သိရပါရေ။
အဆိုပါပစ်မှတ်တိထဲမာ မြောက်ဦးမြို့ ထမ္မရစ်ရပ်ကွက်၊ ကင်းဆိမ်ရွာ၊ ဘုရားသုံးဆူကုန်း၊တာဘောင်ထိပ်ကုန်း၊ ရီကန်ကွေ့ အပါအဝင် မြို့ပေါ်ရပ်ကွက်တိနန့် အပါးဟပ်စပ်ရပ်ရွာတိသို့ အကွာအဝီးနန့် ဒီဂရီအတိုင်းအတာထိကို စိသားကိုက် ချိန်ထားစွာ တွိရပါရေ။
လက်ဟိ ရက္ခိုင်ပြည်မာ စစ်ရာဇဝတ်မှုတိကို ပြက်ရယ်ပြုပနာ ပြောင်ပြောင် တင်းတင်း ရက်ရဲဇက်ရဲ ကျူးလွန်နီရေ စစ်ကောင်စီတပ်စွာ ပြည်သူလူထုကို အဓိက ပစ်မှတ်ထားလို့ ရည်ရွယ်ချက်ဟိဟိ တသိတမင်ပစ်ခတ်သတ်ဖြတ်ဖို့ စနစ်တကျကြိုတင်ပလန်ချထားပြီးကေ သူရို့၏ တပ်စခန်းတိကို စွန့်ခွာလားလို့ ဖြစ်စီ၊ သိမ်းပိုက်ရဟိလို့ဖြစ်စီ သူရို့စခန်းတိထဲက ယုတ်မာကောက်ကျစ်စွာ ပြင်ဆင်ထားရေလူထုပစ်မှတ်သက်သီတိကို ရက်ပြတ် တွိနီကတ်ရပါရေ။
