APM၊ နိုဗမ်ဘာ ၂၈ / ၂၀၂၄
သံတွဲမြို့နယ်မာ နိုဗမ်ဘာ ၂၇ ရက်နိ၊ မိုးထပိုင်း က အကြမ်းဖက် စစ်ကောင်စီ၏ လီကြောင်းဗုံးကြဲတိုက်ခိုက်မှုကြောင့် အပြည်မဲ့ပြည်သူ ၈ ယောက် ဒဏ်ရာရလားရေလို့ ဒေသခံတိကပြောပါရေ။
ဒဏ်ရာရလားရေလူတိကတော့ သံတွဲမြို့နယ်၊နန်းချောင်းရွာက ဦးကျော်လင်းသူ (၄၀ နှစ်)၊ မအေးသန္တာထွေး (၁၇ နှစ်)၊ လင်းသာရွာက စစ်ဖီးယှောင်နီရေ မောင်ခန့်ပိုင်စိုး (၁၇ နှစ်)၊ မအိမြင့်မြတ်ဖြိုး(၁၇ နှစ်)၊ ဒေါ်ငယ်မရီး (၅၀ နှစ်) နန့် ဂျိတ္တောရွာက စစ်ဖီးယှောင်နီရေ ဒေါ်ခင်၀င်း (၇၁ နှစ်)၊ ကိုအောင်ခန့်ကျော် (၂၄ နှစ်)၊ ဦးမောင်ရိုင်သိန်း (၅၈ နှစ်) ရို့ဖြစ်ကတ်ပါရေ။
နိုဗမ်ဘာ ၂၇ရက်နိ၊ မိုးထ ၁၁ နာရီလောက်မာ ဖက်ဆစ်အကြမ်းဖက်စစ်ကောင်စီ၏ ဂျက်ဖိုက်တာစွာ နန်းချောင်းရွာနန့် လျှပ်စစ်ဓာတ်အားခွဲရုံကို ဗုံးကြဲချခရေလို့ ဒေသခံတယောက်က Arakan Princess Media ကို ပြောပါရေ။
ယင်းဗုံးသီးကျရောက်ပေါက်ကွဲမှုကြောင့် ဦးကျော်လင်းသူ၊ မအေးသန္တာထွေး၊ မောင်ခန့်ပိုင်စိုး၊ မအိမြင့်မြတ်ဖြိုး၊ ဒေါ်ငယ်မရီး၊ ဒေါ်ခင်၀င်း၊ ကိုအောင်ခန့်ကျော်နန့် ဦးမောင်ရိုင်သိန်းရို့ ထိခိုက်ဒဏ်ရာရလားရေပိုင် အပါးဟပ်စပ်က နီအိမ်အဆောက်အအုံတချို့လည်း ထိခိုက်ပျက်စီးလားရေလို့ ဆိုပါရေ။
လက်ဟိမာ ဒဏ်ရာရလားရေလူတိစွာ အရေးပေါ်ဆီးကူးသမှုခံယူနီရရေလို့ သိရပါရေ။
ပုံစာ- ၂၀၂၄ ခုနှစ်၊နိုဗမ်ဘာ ၂၇ ရက်နိ၊ မိုးထ ၁၁ နာရီအချိန်ခန့်၌ သံတွဲမြို့နယ်၊ နန်းချောင်းရွာကို အကြမ်းဖက် စစ်ကောင်စီက ဂျက်ဖိုက်တာနန့် ဗုံးကြဲတိုက်ခိုက်မှုဖြစ်စဉ်အတွင်း ထိခိုက် ဒဏ်ရာရလားသူများကို တွိရစဉ် (APM)။
