APM ၊ နိုဗမ်ဘာ ၂၈ / ၂၀၂၃
ဒေနိ (နိုဗမ်ဘာ ၂၈ ရက်နိ)မိုးထစောစောက ကျောက်တော်မြို့နယ်မာ စစ်ကောင်စီတပ် လက်နက်ချေနန့် ပစ်ခတ်မှုကြောင့် ဒေသခံပြည်သူတယောက် ထိခိုက်ဒဏ်ရာရလားခရေလို့သိရပါရေ။
ဒဏ်ရာရလားလူစွာ ကျောက်တော်မြို့နယ်၊ ပြင်လှရွာက ကိုအောင်နိုင်ချေ(၃၅ နှစ်) ဖြစ်ပါရေ။
ကိုအောင်နိုင်ချေစွာ ဒေနိမိုးထစောစော ၄ နာရီကျော်က ဒေါင်းတောင်ယိုးကျေးရွာ၊ အုတ်ဖော်အနားမာ ထောင်ထားခရေ ငါးမြုံးကို ဖော်ဖို့လားလားချိန် ဒေါင်းတောင်ယိုးမာ အခြီချထားရေ စစ်ကောင်စီ၏ ခလရ(၃၇၆) တပ်ရင်း တပ်ဖွဲ့ ဝင်တိက လက်နက်ချေတိနန့် လှမ်းပစ်ခကတ်စွာလို့ သိရပါရေ။
ယင်းပိုင်လက်နက်ချေနန့် ပစ်ခတ်လို့ ကိုအောင်နိုင်ချေ၏ ညာဖက်ဝမ်းမာ ကျည်ကျဒဏ်ရာရလားရေလို့ ဆိုပါရေ။
လက်ဟိ ကိုအောင်နိုင်ချေစွာ ကျောက်တော်မြို့နယ်၊သရက်တပင်ဆီးရုံးမာ ဆီးကုသမှုခံယူနီရေလို့ သိရပါရေ။
Please follow and like us:
