APM၊ နိုဗမ်ဘာ ၂၈ /၂၀၂၃
မြောက်ဦးမြို့နယ်မာ နိုဗမ်ဘာ ၂၇ ရက်နိ ညဇာ ၈ နာရီကျော်က စစ်ကောင်စီတပ်ဖွဲ့ဝင်တိ ရည်ရွယ်ချက်ဟိဟိ လက်နက်ချေနန့်ပစ်ခတ်လို့ အရပ်သားပြည်သူတယောက် သီဆုံးလားရေလို့ သိရပါရေ။
သီဆုံးလားလူမာ မြောက်ဦးမြို့နယ်၊ ပန်းဖဲတန်းရွာက မချိုချို(၁၆ နှစ်) ဖြစ်ပါရေ။
မချိုချို စွာ နိုဗမ်ဘာ ၂၇ ရက်နိ ညဇာ ၈ နာရီကျော်လောက်က အိမ်မာဟိနီချိန် မြောက်ဦးအခြီစိုက် ခမရ(၃၇၈) တပ်ရင်းက စစ်ကောင်စီတပ်ဖွဲ့ဝင်တိ လက်နက်ချေနန့် လိုက်ပစ်ခကြောင်း မျက်မြင်ဒေသခံတိကပြောပါရေ။
ယင်းလက်နက်ချေကျည်တိစွာ မချိုချို၏ ကျည် (၂) ချက်ကျခပြီးကေ နီရာမာပင် ဂွင်တိုင်း သီဆုံးလားရေလို့ ဆိုပါရေ။
ရက္ခိုင်မာ ရက္ခိုင့်တပ်တော်AAနန့် စစ်ကောင်စီတပ်ရို့တိုက်ပွဲဖြစ်ပြီးနောက်ပိုင်း စစ်ကောင်စီတပ်က အရပ်သားပြည်သူတိနီထိုင်ရေ ရပ်ရွာတိကို လက်နက်ကြီး၊ လက်နက်ချေတိနန့် ရည်ရွယ်ချက်ဟိဟိ ပစ်ခတ်တိုက်ခိုက်နီပါရေ။
တချိန်တည်းမာ ယင်းလက်နက်ကြီး၊ လက်နက်ချေ ကျည်တိကြောင့်လည်း အရပ်သားပြည်သူတိ သီဆုံး၊ ထိခိုက်ဒဏ်ရာရမှု၊ အိုးအိမ်အဆောက်အအုံပျက်စီဆုံးယှုံးမှုတိ တရက်ထက်တရက် ပိုလို့ များပြားလာနီပါရေ။
