APM၊ စပ်တမ်ဘာ ၂၇ / ၂၀၂၃
အာသျှတလွှား အွန်လိုင်းကနီ လိမ်လည်နီရေ ရာဇဝတ်ဂိုဏ်းတိစွာ မြန်မာပြည်မာ ပိုလို့ အခြီစိုက်လာရေလို့ မူးယစ်ဆီးဝါး နန့် ရာဇဝတ်မှုဆိုင်ရာ ကုလသမဂ္ဂရုံး(UNODC)က စပ်တမ်ဘာ ၂၆ ရက်နိ ထုတ်ပြန်ရေ အစီရင်ခံစာမာ ဖော်ပြထားပါရေ။
မြန်မာပြည်မာ စစ်တပ်က အာဏာသိမ်းပြီးနောက်ပိုင်း တိုက်ပွဲတိပြင်းထန်စွာဖြစ်ပွားနီစွာကို အခွင့်ကောင်းယူပနာ အွန်လိုင်း လိမ်လည်ရေဂိုဏ်းတိ ပိုလို့အခြီစိုက်ပြီးကေ ကြီးထွားလာနီရေလို့ အစီရင်ခံစာမာ ပါဟိပါရေ။
ယင်း အွန်လိုင်းကနီ လိမ်လည်နီရေ ရာဇဝတ်ဂိုဏ်းတိစွာ ထိုင်းနိုင်ငံ နန့် နယ်စပ် လက်နက်ကိုင်တိ ကြီးစိုးရေ မြဝတီမြို့နယ် ရွှီကုက္ကိုလ်မာ အများစုဟိနီပြီးကေ “ဝ” နန့် ကိုးကန့်ဒေသ တိမာ ပိုမိုအခြီစိုက်လာနီစွာကို တွိမြင်နီရရေလို ဆိုပါရေ။
လိမ်လည်ခံရလူ အများစုစွာ လူငယ်ပညာတတ်တိဖြစ်ပြီးကေ မြန်မာပြည်မာ တရားဝင်အနီ နန့် ခေါ်ယူရေပုံစံမျိုး ၊ မက်လုံးပီး ခေါ်ယူစွာတိမျိုးတိကို ခံယူခကတ်ရပနာ တာဝန်ဟိရေလူတိက ငွေပီးလို့ ကယ်ထုတ်နီရရေလို့ ပြောဆိုထားပါရေ။
ယင်းအပြင် အာသျှတလွှား တရုတ်နိုင်ငံ နန့် ထိုင်ဝမ်ရို့က ရာဇဝတ်ဂိုဏ်းတိစွာ မဲခေါင်ဒေသနိုင်ငံတိအပြင် ထိုင်းနန့် ဖိလစ်ပိုင်နိုင်ငံရို့မာပါ အခြီစိုက်လာစွာကို အာဏာပိုင်တိက နှိမ်နင်းခကေလေ့ ပဋိပက္ခဖြစ်နီရေ မြန်မာပြည်မာတော့ နှိမ်နင်းမှုတိ အားနည်းရေအတွက် ပိုလို့အခြီစိုက်လာနီကြောင်း ထုတ်ပြန်ချက်မာ ဖော်ပြထားပါရေ။
Source – UNODC: Cyber Scam Bases Creep More Deeply into Myanmar
Photo – UN
