APM ၊ စပ်တမ်ဘာ ၂၇ / ၂၀၂၃
မြောက်ဦး တိန်ညိုစစ်ဖီးယှောင်စခန်းမာ လတ်တလော စားနပ်ရိက္ခာနန့်အခြီခံလူသုံးကုန်ပစ္စည်းတိ အရေးတကြီး လိုအပ်နီရေလို့ သိရပါရေ။
မေ ၁၄ ရက်နိက တိုက်ခတ်ခသည့် Mocha ဆိုင်ကလုန်းမုန်တိုင်းကြောင့် ယင်းစစ်ဖီးယှောင်စခန်းကနီအိမ်တိ အားလုံး ပြိုပျက်ခရပြီးနောက် စစ်ဖီးယှောင်တိစွာ လူမှုစီးပွားအခက်အခဲတိနန့် ရင်ဆိုင်နီကတ်ရပြီးကေ စားဝတ်နီရီး အခက်အခဲ ဖြစ်နီကတ်ရကြောင်း စစ်ဖီးယှောင်တိက ပြောပါရေ။
စခန်းဟိ စစ်ဖီးယှောင်အများစုမာလည်း ကြုံရာကျဘန်းအလုပ်တိကိုဝင်လုပ်ပနာ စားဝတ်နီရီးအတွက် ဖြစ်တေပိုင် ရုန်းကန် နီကတ်ရလူတိဖြစ်ပြီးကေ မုန်တိုင်းတိုက်ပြီးနောက်ပိုင်း အလုပ်အကိုင် ယှားပါးလားရေပိုင် ကုန်ဈီးနှုန်းတိလည်း အဆမတန် တက်နီလို့ အဆင်မပြေမှုတိကို ဆိုးဝါးစွာရင်ဆိုင်နီကတ်ရရေလို့ဆိုပါရေ။
ယင်းအပြင် ယင်းစစ်ဖီးယှောင်စခန်းဟိ ယာယီအဆောင်တိကိုလည်းအပူတပြင်း ပြန်ပြုပျင်ဖို့လိုအပ်နီရေလို့ သိရပါရေ။
မြောက်ဦး တိန်ညိုစစ်ဖီးယှောင်စခန်းမာအိမ်ထောင်စု ၆၈၀ စု နန့် လူဦးရေ ၂၁၁၆ ယောက်ခိုလှုံနီရေလို့ သိရပါရေ။
