APM၊ ဩဂတ်စ် ၂၇/ ၂၀၂၃
ဘင်္ဂလားဒေ့ချ်နိုင်ငံ၊ စစ်တကောင်းမြို့တွင် ဒေနိ(ဩဂတ်စ် ၂၇ရက်)နိ၊ မိုးထပိုင်းက မိုးကြီးမြီပြိုမှုကြောင့် အချေ ၁ယောက် အပါအဝင် သားဖနှစ်ယောက်သီဆုံးခကြောင်း သိရသည်။
စစ်တကောင်းမြို့၊ ချိုလောချာဟာရပ်ကွက်တွင် ဖြစ်ပွားခသည့် အဆိုပါမြီပြိုမှုတွင် အသက် ၃၅နှစ်အရွယ် မိုဟာမက် ဆိုဟဲလ် ဆိုလူနန့် ၎င်း၏ ခုနှစ်လအရွယ်သမီးချေတယောက်သီဆုံးခပြီး တခြားလူနှစ်ယောက် ထိခိုက်ဒဏ်ရာရဟိခသည်ဟု စစ်တကောင်းမီးသတ်ဌာန၏ လက်ထောက်ညွှန်ကြားရီးမှူး အဗ္ဗဒူလချ် ဟာရွန်ပါချာက ဆိုသည်။
စစ်တကောင်းမြို့တွင် ဩဂတ်စ် ၂၆ရက်နိ ညည့်ကစ၍ ဒေနိအထိ မိုးပြင်းပြင်းထန်ထန်ရွာသွန်းနီရာ နီအိမ်အထက်သို့ တောင်ကုန်းမြီပြိုကျ၍ အိမ်ထက်တွင် ဟိနီသည့် သားဖနှစ်ယောက် မြီပိသီဆုံးခခြင်းဖြစ်သည်။
မြီပြိုကျမှုအတွင်း အပျက်အစီးများအောက်တွင် တခြား လူ ၂ယောက်ပိတ်မိခပြီး ဒေသခံများ၏ အကူအညီနန့် မီးသတ်တပ်ဖွဲ့ဝင် များကကယ်ဆယ်နိုင်ခကာ စစ်တကောင်းဆီးရုံသို့ ပို့ဆောင်ခကြောင်း ၎င်းက ဆက်လက်ပြောကြားသည်။
ဘင်္ဂလားဒေ့ချ်မိုးလီဝသဌာနမှ ထုတ်ပြန်ချက်အရ စစ်တကောင်းမြို့တွင် ဩဂတ်စ် ၂၆ရက်နိညည့် ၁၂နာရီမှ ဒေနိမိုးထ ၉ နာရီအထိ ၈ နာရီအတွင်း မိုးရီချိန် ၇၆.၄ မီလီမီတာရွာသွန်းခရာ မြို့ထဲတွင် ရီနစ်မြုပ်မှုများဖြစ်နီကြောင်း သိဟိရသည်။
Source Landslide due to heavy rain in Chittagong kills father, daughter
Photo – Focus Bangla
