APM ၊ မေ ၂၇ / ၂၀၂၃
ရသေ့တောင်မြို့နယ်၊ ဒုံးပိုက်ရွာတွင် ဒေနိ(မေ ၂၇ ရက်နိ) မိုးထက တောဆင်ရိုင်း အနင်းခံရ၍ သက်ကြီးပိုင်းအမျိုး သားတယောက် ပွဲချင်းပြီး သီဆုံးလားကြောင်း သတင်းရဟိသည်။
သီဆုံးလားသူမှာ ဦးမောင်လှကြီး (၇၂ နှစ်) ဖြစ်သည်။
ဦးမောင်လှကြီးသည် ဒေနိမိုးထ ၇ နာရီလောက်က ဒုံးပိုက်ရွာ အရှိဖက်ဟိ ၎င်း၏တောင်ယာခင်း၌ မုန်တိုင်းကြောင့် လဲကျနီသည့် သစ်ပင်များကို ယှင်းရန်လားစဉ် တောဆင်ရိုင်းအုပ်နန့် ထိပ်တိုက်တိုးခသည်။
အနားဟိ ဟင်းရှာလာသည့်ရွာသားများက လှမ်းအော် အသိပီးခကေလေ့ ဦးမောင်လှကြီးမှာ နားထိုင်းသူဖြစ်၍ မကြားသဖြင့် ဆင်ရိုင်းများ အနားရောက်ခါမှ ထွက်ဗြီးကေလေ့ မလွတ်ခဘဲ နင်းသတ်ခံလိုက်ရသည်။
တောဆင်ရိုင်းများနင်းသတ်ခြင်းကြောင့် ဦးမောင်လှကြီးမှာ နီရာ၌ပင် ပွဲချင်းပြီးသီဆုံးလားခသည်။
ရွာသားများက ၎င်း၏ ရုပ်အလောင်းကို လားရောက်ယူ ဆောင်ထားပြီး ဒေနိညဇာ ၃ နာရီလောက်တွင် ရွာသင်္ချိုင်း ၌ သင်္ဂြိုလ်လားမည်ဟု သိရသည်။
ဒုံးပိုက်ရွာတွင် ကုန်ခသည့် မေ ၁၄ ရက်နိကလေ့ Mocha ဆိုင်ကလုန်းမုန်တိုင်းတိုက်ခတ်မှုကြောင့် ရွာသားများခိုလှုံနီသည့် ဓမ္မာရုံပြိုကျကာ ရွာသား ၁၃ ယောက်သီဆုံး ခရသိမ့်သည်။
ယင်းအပြင် ဒုံးပိုက်ရွာသည် မုန်တိုင်းကြောင့်လူနီအိမ်များအားလုံနီးပါးပျက်စီးဆုံးယှုံးခရပြီး ရွာသားများ စားဝတ်နီရီး အခက်အခဲဖြစ်နီသည့်အပြင်တောဆင်ရိုင်းများ အန္တ ရာယ်ကိုပါ စိုးရိမ်နီကတ်ရကြောင်း သိရသည်။
