APM ၊ ဧပြီ ၂၇ / ၂၀၂၃
ရက္ခိုင်ပြည်တွင် လူမှုအကျိုးဆောင်လုပ်ငန်းများ ဆောင်ရွက်ရန်အတွက် ဂျပန်အစိုးရကလှူဒါန်းထားသည့် သင်္ဘော များကို မြန်မာစစ်တပ်က စစ်ရီးတွင်အသုံးနီမှုအား ဂျပန်နိုင်ငံခြားရီးဝန်ကြီးဌာန ကန်ကွက်ကြောင်း ဂျပန်သတင်းဌာန NHK ၏ ဧပြီ ၂၅ ရက်နိတွင် ရွီးသားဖော်ပြထားချက်အရ သိရသည်။
ဂျပန်နိုင်ငံက ရက္ခိုင်ပြည်အတွင်း ရီကြောင်းလားလာရီးများ အဆင့်မြှင့်တင်နိုင်ရန်အတွက် ၂၀၁၇ ခုနှစ်မှ ၂၀၁၉ ခုနှစ် အတွင်း လူစီးသင်္ဘော ၃ စီး လှူဒါန်းထားခသည်။
ယင်း သင်္ဘောများကို မြန်မာစစ်တပ်က စစ်ရီးစကိစ္စရပ်များတွင် အသုံးပြုနီသည်ဟု လူ့အခွင့်အရေးအဖွဲ့ Human Rights Watch (HRW) က ၂၀၂၂ ခုနှစ် အောက်တိုဘာလတွင် အစီရင်ခံစာ ထုတ်ပြန်ခပြီးနောက် ဂျပန်နိုင်ငံခြားရီး ဝန်ကြီးဌာန အတွင်းဝန် Ono Hikariko က ယင်းသို့ထုတ်ပြန်ပြောဆိုလာခြင်းဖြစ်သည်။
အဂုပိုင် အဖြစ်အပျက်များကို တားဆီးနိုင်ရန် ကြိုးပမ်းလားမည်ဖြစ်ပြီး မှန်ကန်သည့်နီရာများတွင်ရာ ဆက်လက် အသုံး ပြုနိုင်ရန် လုပ်ဆောင်လားမည်ဟုလေ့ Ono Hikariko က ဆိုသည်။
ဂျပန်နိုင်ငံအစိုးရအနီနန့် ရက္ခိုင်ပြည်သူများ၏ လမ်းပန်းဆက်သွယ်ရီး အဆင်ပြေစီရန်နန့် လုံခြုံမှု ပိုဟိစီရန် ရည်ရွယ်၍ ယင်းရီယာဉ်များကိုလှူဒါန်းခြင်းရာဖြစ်ပြီး ၎င်းသင်္ဘောများအား မြန်မာစစ်တပ်က စစ်ရီးတွင် အသုံးပြုမှုကို တာဆီး ရန်ကြိုးပမ်းလားမည်ဖြစ်ကြောင်းလေ့ Ono Hikariko ပြောဆိုခကြောင်း သိဟိရသည်။
