APM ၊ ဒီဇမ်ဘာ ၂၇ / ၂၀၂၃
အမ်းမြို့နယ်မာ ဒေနိ(ဒီဇမ်ဘာ ၂၇ ရက်နိ) နိခင်းက အကြမ်းဖက်စစ်ကောင်စီတပ်၏လက်နက်ကြီး ယမ်းကား ပစ်ခတ်မှုကြောင့် အထက်ရွာဟောင်းက လူနီ အိမ်နှစ်ဆောင် ပျက်စီလားကြောင်း သိရပါရေ။
ပျက်စီးလားရေ အိမ်တိမာ အမ်းမြို့နယ်၊ အထက်ရွာဟောင်းရွာက ဦးမောင်တင်ဝင်း၏ အိမ်နန့် ဦးင/ပြူ၏ အိမ်တိလို့ သိရပါရေ။
ဒေနိ၊ နိခင်း ၁၁ နာရီလောက်မာ အမ်းမြို့နယ်၊ ကဇုကိုင်း၊ တောဟိန်းတောင် မာ အခြီပြုထားရေ အကြမ်းဖက်စစ်ကောင်စီ တပ်က အထက်ရွာဟောင်းရွာကို ဦးတည်ပြီးကေ လက်နက်ကြီးတိနန့်ယမ်းကားပစ်ခတ် နီခပါရေ။
ယင်းအထဲက လက်နက်ကြီးကျည်တလုံးစွာ ဦးမောင်တင်ဝင်း၏အိမ် နောက်ဖက်မိုးဇွန်းသို့ ကျရောက်ပေါက်ကွဲခပြီးကေ အိမ်မိုးဇွန်းနန့် ထရံတိပျက်စီးလာရေပိုင် ဦးင/ပြူးအိမ် နားမာလည်း တလုံးကျရောက် ပေါက်ကွဲခလို့ အိမ်နောက်ဖက် မိုးဇွန်း ပျက်စီးလားခရပါရေ။
ယင်းအပြင် နောက်ထက်လက်နက်ကြီးကျည်တလုံးလည်း အထက်ရွာဟောင်းရွာ၊ စာသင်ကျောင်းအရှိဖက်ဟိ ရီတွင်းနားမာ ကျရောက်ပေါက် ကွဲခလို့ ရီတွင်းနံရံတိပျက်စီးလားခပါသိမ့်ရေ။
ရက္ခိုင်ပြည်မာ ရက္ခိုင့်တပ်တော်AAနန့် စစ်ကောင်စီတပ်ရို့ တကျော့ပြန်တိုက်ပွဲတိစတင်ပြီးနောက်ပိုင်း စစ်ကောင်စီစွာ အရပ်သားပြည်သူတိနီထိုင်ရာ မြို့ရွာတိကို လက်နက်ကြီး၊လက်နက်ချေတိ၊ စစ်သင်္ဘော၊ဒရုန်း၊ရဟတ်ယာဉ်၊ တိုက်လီ ယာဉ်တိနန့် ရည်ရွယ်ချက်ဟိဟိ နိစဉ်နိတိုင်း ယမ်းကား ပစ်ခတ်တိုက်ခိုက်လျက်ဟိပါရေ။
ယင်းပိုင် တိုက်ခိုက်မှုတိကြောင့် ရက္ခိုင်ပြည်အနှံ့က အပြစ်မဲ့အရပ်သား ပြည်သူ သီဆုံး၊ ထိခိုက်ဒဏ်ရာရမှုတိ၊ အိုးအိမ် အဆောက်အအုံပျက်စီးဆုံးယှုံးမှုတိ တရက်ထက်တရက် ပိုလို့ များပြားလာနီကြောင်း သိဟိရပါရေ။
