APM ၊ စပ်တမ်ဘာ ၂၆ /၂၀၂၃
ရက္ခိုင်မာ Mochaဆိုင်ကလုန်းမုန်တိုင်းကြောင့် ပျက်စီးလားရေ ဘာသာရီးအဆောက်အအုံတချို့စွာ လက်ဟိ ၄ လကျော်ကြာရေအထိ ပြန်မပြုပျင်နိုင်သိမ့်ကြောင်း သိရပါရေ။
ရက္ခိုင်မာ ပြီးခရေ မေ ၁၄ ရက်နိက Mocha ဆိုင်ကလုန်းမုန်တိုင်းတိုက်ခတ်မှုအတွင်း ရက္ခိုင်တပြည်လုံးဟိ ဘာသာရီးအဆောက်အအုံ ပေါင်း ၁၅၀ဝ ကျော် ပျက်စီးခပါရေ။
ယင်းအဆောက်အအုံတိထဲက တချို့စွာ လက်ဟိမာ မုန်တိုင်းတိုက်လို့ ၄ လကျော်ကြာလာရေအထိ ငွေကြေးအခက်အခဲကြောင့် ပြန်ပြုပျင်နိုင်ခြင်းမဟိသိမ့်ပိုင် တချို့မာလည်း ပြုပျင်ယင်းတန်းလန်းရပ်ထားရရေလို့ ဒေသခံတိက ပြောပါရေ။
စစ်ကောင်စီစွာ မုန်တိုင်းတိုက်ခတ်ပြီးနောက်ပိုင်းဘာသာရီးအဆောက်အအုံ ၄၀ ကျော်ကို ပြန်လည်ပြုပျင်နိုင်ရီး ကူညီထောက်ပံ့ပီးဖို့ဆိုပျာ စာရင်း ကောက်ယူခကေလေ့ လက်ဟိအချိန်အထိ တပြားတချပ်လည်း ကူညီ ထောက်ပံ့ပီးစွာမဟိသိမ့်လို့ ဆိုပါရေ။
Mocha မုန်တိုင်းတိုက်ခတ်ပြီးနောက်ပိုင်း ၄ လကျော်ကြာလာကေလေ့ ဘာသာရီးအဆောက်အအုံတိကို ပြန်ပြုပျင်ဖို့ ထိရောက်တေ အကူအညီ တစုံတရာမရသိမ့်လို့ ကိုယ်ထူကိုယ်ထ ပြုပျင်နီရပြီးကေ ငွေကြေးမလုံလောက်မှုကြောင့် အခက်အခဲဖြစ်နီကတ်ရရေလို့ သိဟိရပါရေ။
