
APM ၊ စပ်တမ်ဘာ ၂၅ / ၂၀၂၃
ရန်ကုန်မာ ကျောင်းတက်ဖို့ရောက်နီရေ မာန်အောင်မြို့နယ်က အဝီးသင်တက္ကသိုလ်ကျောင်းသူတယောက်မာ ပျောက်နီစွာ ၁၀ ရက်အထိဟိလာကေလေ့ လက်ဟိအချိန်ထိမိသားစုနန့်အဆက်အသွယ်မရသိမ့်လို့သိရပါရေ။
ယင်းကျောင်းသူမာ မာန်အောင်မြို့နယ်၊ ညောင်ပင်လှရွာက အသက်(၂၀)အရွယ် မလှိုင်ရတနာထွန်းဖြစ်ပါရေ။
မလှိုင်ရတနာထွန်းစွာ မြန်မာစာ(ဒုတိယနှစ်)တက်ရောက်ဖို့ ရန်ကုန်သို့ ရောက်နီစွာဖြစ်ပြီးကေ လှိုင်သာယာမြို့နယ်၊ ကျန်စစ်မင်းအိမ်ရာ၊ တိုက်အမှတ်(၂၆)မာ အစ်ကိုဖြစ်သူနန့်တတူ နီထိုင်နီစွာဖြစ်ပါရေ၊။
သူမစွာ စပ်တမ်ဘာ ၁၆ ရက်နိက ကျန်စစ်မင်းအိမ်ရာ၊ တိုက်အမှတ်(၃၂)ဟိ အစ်ကိုဖြစ်သူပိုင်ဆိုင်ရေ အသုပ်ဆိုင်မာ ဆိုင်ကူရောင်းနီစွာကနီ ထမင်းစားဖို့ အိမ်ပြန်လာချိန် လမ်းမာ ပျောက်လားခစွာဖြစ်ပါရေ။
လက်ဟိ မလှိုင်ရတနာထွန်း ပျောက်နီစွာ ၁၀ ရက်ကြာလာကေလေ့ တစုံတရာအဆက်အသွယ် မရဟိသိမ့်လို့ မိသားစုတိ စိတ်ပူနီကတ်ပါရေ။
ပြီးခရေ စပ်တမ်ဘာ ၁၁ ရက်နိကလေ့ ရန်ကုန်မာကျောင်းတက်နီရေ မြောက်ဦးမြို့နယ်က အသက် ၁၈ နှစ် အရွယ် Grade 11 ကျောင်းသားတယောက် ကျူသျှင်သို့ လားစွာမာ ပျောက်လားခသိမ့်ပါရေ။
