APM၊ စပ်တမ်ဘာ ၂၅/ ၂၀၂၅
မြန်မာပြည်မာ အကြမ်းဖက်မှုတိ ချက်ချင်းရပ်ဖို့ အမေရိကန်၊ ဩစတြီးယား၊ အိန္ဒိယနန့် ဂျပန်နိုင်ငံရို့ ဖွဲ့စည်းထားရေ Quad အဖွဲ့၏ နိုင်ငံခြားရီးဝန်ကြီးတိက ပူးတွဲကြေညာချက်ထုတ်ပြန်တောင်းဆိုပါရေ။
အင်ဒို-ပစိဖိတ်ဒေသ သာယာဝဖြိုးရီးကို ထောက်ပံ့ဖို့ ဒီမိုကရေစီအင်အားကြီးနိုင်ငံ ၄ နိုင်ငံနန့် ဖွဲ့စည်းထားရေ Quad အဖွဲ့၏ နိုင်ငံခြားရီးဝန်ကြီးတိစွာ နယူးယောက်မြို့မာ ကျင်းပနီရေ (၇၈) ကြိမ်မြောက် ကုလသမဂ္ဂ အထွေထွေ ညီလာခံမာ စပ်တမ် ဘာ ၂၂ရက်နိက တွိဆုံခပြီးနောက် ကြေညာချက်ထုတ်ပြန်လာစွာ ဖြစ်ပါရေ။
မြန်မာပြည်မာ နိုင်ငံရီး၊ လူသားချင်းစာနာထောက်ထားမှုနန့် စီးပွားရီးအကျပ်အတည်းကြောင့် စိုးရိမ်ပူပန်နီပြီးကေ အကြမ်းဖက်မှုတိကို ချက်ချင်းရပ်တန့်ဖို့နန့် မတရားဖမ်းဆီခံထားရလူတိကို ပြန်လွှတ်ပီးဖို့ ထုတ်ပြန်ချက်မာ တောင်းဆိုထားပါရေ။
အလားတူ လူသားချင်းစာနာထောက်ထားမှုဆိုင်ရာ အကူအညီတိကို အဟန့်အတားမဟိ ခွင့်ပြုပီးဖို့၊ အပြုသဘောဆောင်ရေ တွိဆုံဆွေးနွေးမှုတိကတဆင့် အကျပ်အတည်းကို ဖြေယှင်းဖို့နန့် မြန်မာပြည်အသွင်ကူးပြောင်းရီးသို့ ရောက်ဖို့ တောင်းဆို ရေလို့ ဖော်ပြထားပါရေ။
ယင်းအပြင် မူးယစ်ဆီးဝါးနန့် လူကုန်ကူးမှုရို့ပိုင် နိုင်ငံဖြတ်ကျော် ရာဇဝတ်မှုတိ မြင့်တက်လာခြင်းအပါအဝင် မြန်မာပြည်မာ ဖြစ်ပွားနီရေ အခြေအနီတိကိုလည်း စိုးရိမ်မိရေလို့ ဆိုပါရေ။
မြန်မာအရေးအတွက် အာဆီယံဦးဆောင်ရေ ကြိုးပမ်းအားထုတ်မှုတိနန့် အာဆီယံ၏ ဘုံသဘောတူညီချက်ငါးရပ်အပေါ် အခိုင်အမာ ထောက်ခံကြောင်း၊ မြန်မာပြည်မာ အကြမ်းဖက်မှုတိ အဆုံးသတ်ရီးအတွက် လက်တွိကျပြီးကေ အပြုသဘောဆောင်ရေ နည်းလမ်းနန့် ပူးပေါင်းလုပ်ဆောင်ဖို့ နိုင်ငံတကာကို တိုက်တွန်းကြောင်း ထုတ်ပြန်ချက်မာ ဖော်ပြထားပါရေ။
Source – Joint Readout of the Quad Foreign Ministers Meeting, September 22, 2023
Photo Reuters
