APM၊ ဧပြီ ၂၅/၂၀၂၅
ကျောက်ဖြူမြို့နယ်မာ ဧပြီ ၂၄ ရက်နိ၊ နိခင်းပိုင်းအချိန် ဖက်ဆစ် စစ်ကောင်စီက အသီခံဒရုန်းတိ အသုံးပြုပြီးကေ (၃) ကြိမ်တိုင်တိုင် ဗုံးကြဲတိုက်ခိုက်ခလို့ စစ်ဖီးယှောင်ပြည်သူတယောက် သီဆုံးလားပနာ နောက်ထပ် တယောက် ဒဏ်ရာ ရလားရေလို့ ဒေသခံတိက ပြောပါရေ။
သီဆုံးလားရေလူစွာ ကျောက်ဖြူမြို့နယ်၊ ရီနံတောင်ရွာမာ စစ်ဖီးယှောင်နီရေ ကုလဘာရွာက ဒေါ်မယဉ်နု (၆၂ နှစ်) ဖြစ်ပါရေ။
ဒဏ်ရာရလားရေ လူကတော့ ကျောက်ဖြူမြို့နယ်၊ ရီနံတောင်ရွာက ဦးလှစံ (၇၆ နှစ်)ဖြစ်ပါရေ။
ဖက်ဆစ် စစ်ကောင်စီစွာ အသီခံဒရုန်းတိအသုံးပြုပနာ ရီနံတောင်ရွာကို ဧပြီ ၂၄ ရက်နိ၊ နိခင်း၂ နာရီ ၅၆ မိနစ်မာတကြိမ်၊ ၃ နာရီ ၅ မိနစ်မာတကြိမ်၊ ၃နာရီ ၁၄ မိနစ်မာ တကြိမ်၊ စုစုပေါင်း (၃)ကြိမ်တိုင်တိုင် ဗုံးကြဲတိုက်ခိုက်ခရေလို့ ဒေသခံတယောက်က Arakan Princess Media ကို ပြောပါရေ။
ယင်းအထဲက ဗုံးသီးတလုံးစွာ ဦးလှစံနီအိမ်ရှိ ဈီးဆိုင်နားမာ ကျရောက်ပေါက်ကွဲခပြီးကေ အိမ်ပိုင်သျှင် ဦးလှစံနန့် ယင်းအိမ်မာ စစ်ဖီးယှောင်ဖို့ ရောက်နီရေ ဒေါ်မယဉ်နုရို့ကျည်စကျပနာ ပြင်းထန်ဒဏ်ရာ ရလားရေလို့ ဆိုပါရေ။
ယင်းနောက် သူရို့နှစ်ယောက်ကို ဆီးကုဖို့နီရာသို့ ပို့ရေခါ ဒေါ်မယဉ်နု စွာ ဒဏ်ရာပြင်းလို့ လမ်းမာ ဆုံးလားရေလို့ သိရပါရေ။
အလားတူ ကျန်ဗုံးသီး ၂ လုံးလည်း ရီနံတောင်ရွာ ဒေါ်အောင်နုမ နီအိမ်ရှိသို့ ကျရောက်ပေါက်ကွဲရာ အနားဟိ မုန့်တီဆိုင်တဆိုင် မီးလောင်ပျက်စီးလားရေပိုင် အိမ်တချို့လည်း ဗုံးစကျပနာ ပျက်စီးလားရေလို့ သိရပါရေ။
Photo – Arakan Princess Media
