ဂုပ္ပီစခန်းက ထွက်ဗြီးလာရေ စစ်ကောင်စီတပ်ဖွဲ့ဝင်တိကို ပိတ်ဆို့ယှင်းလင်းရာ ရန်သူ ၁၂ လောင်းနန့် ဒဏ်ရာရ ၁၀ ကျော်ဖမ်းမိကြောင်း ရက္ခိုင့်တပ်တော် ထုတ်ပြန်
APM၊ မာ့ချ် ၂၅/၂၀၂၄
ဘူးသီးတောင်အခြီစိုက် အကြမ်းဖက်စစ်ကောင်စီတပ် ခမရ(၅၅၂) တပ်ရင်းကို အယှိန်အဟုန်မြှင့် ဆက်လို့ ထိုးစစ်ဆင်တိုက်ခိုင်လျက်ဟိကြောင်း ရက္ခိုင့်တပ်တော် AA က မာ့ ၂၄ ရက်နိ၊ ညည့်မာ ထုတ်ပြန်ပါရေ။
ထုတ်ပြန်ချက်မာ “၂၀၂၄ ခုနှစ်၊ ဖေဖော်ဝါရီလ (၂၄) ရက်မှ စတင်ထိုးစစ်ဆင်တိုက်ခိုက်ခသော ဘူးသီးတောင်အခြီစိုက်၊ ခမရ (၅၅၂) တပ်ရင်းအား ဆက်လက်ထိုးစစ်ဆင်တိုက်ခိုက်လျက်ဟိပြီး စခန်းတခုလုံးကိုသိမ်းပိုက်ရယူရီးအတွက် ထိုးစစ်အား အယှိန်အဟုန်မြှင့် တိုက်ခိုက်လျက်ဟိသည်” လို့ဖော်ပြထားပါရေ။
ယင်းအပြင် ဂုပ္ပီစခန်းက ထွက်ဗြီးလာကတ်တေ ရန်သူတိကိုလည်း ရက္ခိုင့်တပ်တော်၏ ပိတ်ဆို့ဖြတ်တောက်ရီး တပ်ဖွဲ့ဝင်ရို့က မာ့ချ် ၂၀ ရက်နိမာစတင်ပြီးကေ လိုက်လံ ခြီမှုန်း တိုက်ခိုက်လျက်ဟိကြောင်း၊ ဘူးသီးတောင်မြို့နယ်၊ အနောက်ပြင် ( ရွာပျက်) ၏ မီတာ (၃၀၀) ခန့်အကွာမာ အဆိုပါထွက်ဗြီးလာရေ ရန်သူတိထဲက ရန်သူ (၁၂) ယောက်ကို သုတ်သင်ယှင်းလင်းနိုင်ခကြောင်း၊ ရန်သူ့ဖက်က နောက်ထပ် (၁၀) ကျော် ဒဏ်ရာရဟိခပြီး ရန်သူ့လက်နက်ခဲယမ်းအချို့ သိမ်းဆည်း ရမိခကြောင်းနန့် ထွက်ဗြီးနီရေ ရန်သူတိကိုလည်း ရက္ခိုင့်တပ်တော်ကဆက်လက်ခြီမှုန်းတိုက်ခိုက်လျက်ကြောင်း ရက္ခိုင့်တပ်တော်က ဆိုပါရေ။
အကြမ်းဖက် စစ်ကောင်စီစွာ နိုင်ငံအနှံ့အပြားဟိ ၎င်းရို့၏ တပ်စခန်းတိကို တခုပြီးတခု လက်လွှတ်ဆုံးယှုံးနီရရေအတွက် အပြစ်မဲ့ ပြည်သူလူထုအပါအဝင် အရပ်ဖက်ပစ်မှတ်၊ စစ်ပွဲနန့်မသက်ဆိုင်ရေ ပစ်မှတ်တိကိုရာ ဦးတည်တိုက်ခိုက်ပြီး စစ်ရာဇဝတ်မှုတိကို လက်ရဲဇက်ရဲကျူးလွန်လျက်ဟိပါရေ။
ရက္ခိုင့်တပ်တော်အနီနန့် ပြည်သူလူထုရို့ကို နိစဉ်သတ်ဖြတ်နီရေ စစ်ကောင်စီကို ထိုက်သင့်ရေ တုံ့ပြန်တိုက်ခိုက်မှုတိနန့် လက်စားချေ တုံ့ပြန်လားဖို့လို့လည်း ရက္ခိုင့်တပ်တော်၏ ထုတ်ပြန်ချက်မာ ဖော်ပြထားပါရေ။
