APM ၊ မာ့ချ် ၂၄ / ၂၀၂၄
ဒေနိ မာ့ချ် ၂၄ ရက်နိ၊ မိုးထစောစောမာ မင်းပြားမြို့နယ်၊ သေကံရွာကို အကြမ်းဖက်စစ်ကောင်စီတပ်က ဂျက်တိုက်လီယာဉ်နန့် ဗုံးကြဲတိုက်ခိုက်ခလို့ အိမ် ၃ ဆောင်နန့် ဆန်စက်ရုံတရုံပျက်စီးလားကြောင်း သိရပါရေ။
ပျက်စီးလားခရေအိမ်တိကတော့ သေကံရွာက ဦး င / ယောင်း၊ ဒေါ်ဝေနုကြည်နန့် ဦးလှကျော်သိန်းရို့အိမ်တိဖြစ်ပြီးကေ၊ ဆန်စက်ရုံစွာ ဒေါ်သန်းသန်းဌေး၏ဆန်စက်ရုံဖြစ်ပါရေ။
မာ့ချ် ၂၄ ရက်နိ၊ မိုးထစောစော ၁ နာရီလောက်မာ အကြမ်းဖက် စစ်ကောင်စီတပ်က သေကံရွာထဲကို ဂျက်တိုက်လီယာဉ်နန့် ကောက်ကျစ်ယုတ်မာ လူမဆန်စွာ ရည်ရွယ်ချက်ဟိဟိ ဗုံး ၂ လုံး ပစ်ခတ်တိုက်ခိုက်ခကြောင်း ရွာသားတိကပြောပါရေ။
ယင်းအထဲက ဗုံးသီးတလုံးစွာ ဒေါ်ဝေနုကြည် အိမ်အလယ်တည့်တည့်ကို ကျရောက်ပေါက်ကွဲလို့ ဒေါ်ဝေနုကြည်အိမ်အပါအဝင် အိမ်ပါးချင်းဖြစ်ကတ်တေ ဦးင/ယောင်းအိမ်နန့် ဦးလှကျော်သိန်းရို့ အိမ်တိမာ လုံးဝပျက်စီးခပါရေ။
ယင်းအပြင် နောက် ဗုံးသီးတလုံးမာလည်း ဒေါ်သန်းသန်းဌေး ဆန်စက်ရုံကို ကျရောက်ပေါက်ကွဲခလို့ ဆန်စက်ရုံ လုံးဝပျက်စီးလားရေလို့ ဆိုပါရေ။
ကုန်ခရေ ဖေဖော်ဝါရီ ၂၇ ရက်နိကလည်း အကြမ်းဖက်စစ်ကောင်စီတပ်စွာ ယင်းသေကန်ရွာကို ဂျက်တိုက်လီယာဉ်နန့်ဗုံးကြဲတိုက်ခိုက်လို့ အပြစ်မဲ့ပြည်သူ ၁၄ ယောက် ဒဏ်ရာရလားပနာ အိမ် ၁၂ ဆောင်နန့် စာသင်ကျောင်းတဆောင်ပျက်စီးခရပါသိမ့်ရေ။
