
APM ၊ မာ့ချ် ၂၄ / ၂၀၂၄
ရက္ခိုင်ပြည်မာ စစ်ယှုံးစစ်ကောင်စီစွာ ရက္ခိုင့်တပ်တော်ကို စစ်ရီးအရလုံးဝမယှဉ်နိုင်ရေခါ စစ်ရီးနန့်လုံးဝမသက်ဆိုင်ရေ အရပ်သားပြည်သူရို့နီထိုင်ရေ မြို့ရွာတိက လူနီအိမ်အဆောက်အအုံတိ၊ ဆီးရုံ ဆီးခန်းတိ၊ စာသင်ကျောင်းတိ၊ ဈီးတိ၊လမ်းတန်းထားတိကို လီကြောင်း၊ရီကြောင်း၊ လက်နက်ကြီးတိနန့် ဆက်တိုက် ပစ်ခတ်ဖျက်ဆီးလျက်ဟိရာ မာ့ချ် ၂၄ ရက်နိ မိုးထဖက်ကလည်း မြေပုံမြို့နယ်၊ ကမ်းထောင်းကြီးတိုက်နယ်ဆီးရုံကို အကြမ်းဖက်စစ်ကောင်စီတပ်က ဂျက်တိုက်လီယာဉ်နန့် ဗုံးကြဲတိုက်ခိုက်ခပါရေ။
ယင်းပိုင် အကြမ်းဖက် စစ်ကောင်စီက လူမဆန်စွာ စစ်ရာဇဝတ်မှုကျူးလွန်တိုက်ခိုက်မှုကြောင့် ကမ်းထောင်းကြီးဆီးရုံပျက်စီးခရေပိုင် ဆီးဝန်ထမ်းတယောက်ဖြစ်တေ ဆီးအကူ ဒေါ်မဝါ (၄၀ နှစ်)လည်း ဒဏ်ရာပြင်းပြင်း ထန်ထန် ရဟိလားကြောင်း သိရပါရေ။
မာ့ချ် ၂၄ ရက်နိ မိုးထ ၄ နာရီခွဲလောက်မာ အကြမ်းဖက်စစ်ကောင်စီစွာ ကမ်းထောင်းကြီးမြို့ကို ဂျက်တိုက်လီယာဉ်နန့် ဗုံးသီး ၄ လုံးကို ကောက်ကျစ်ယုတ်မာစွာ ကြဲချတိုက်ခိုက်ခကြောင်း ရွာသားတိက ပြောပါရေ။
ယင်းအထဲက ဗုံးသီး ၂ လုံး ကမ်းထောင်းကြီးတိုက်နယ်ဆီးရုံသို့ကျရောက်ပေါက်ကွဲပနာ ဆီးအကူ ဒေါ်မဝါ၏ ဂေါင်းမာ ဗုံးစထိမှန် ဒဏ်ရာပြင်းပြင်းထန်ထန် ရလားရေအပြင် ဆီးရုံက ခွဲစိတ်ခန်းနန့် တခြားအဆောက်အအုံတိလည်း ပျက်စီးခကြောင်း ဆိုပါရေ။
ယင်းအပြင် ဗုံးသီးနောက်တလုံးမာလည်း ကမ်းထောင်းကြီးမြို့မြောက်ဖက်ကျောင်းတိုက်မာ ကျရောက်ပေါက်ကွဲပနာ ဓမ္မာရုံ ပျက်စီးလားခရရေလို့ သိရပါရေ။
ကုန်ခရေ မာ့ချ် ၂၃ ရက်နိကလည်းအကြမ်းဖက်စစ်ကောင်စီက ဂျက်တိုက်လီယာဉ်နန့် ဗုံးကြဲတိုက်ခိုက်လို့ မြေပုံမြို့နယ်၊ သရက်တောင်ရွာသားနှစ်ယောက်သီဆုံးလားရပနာ တယောက် ပြင်းပြင်းထန်ထန် ဒဏ်ရာရလားခရပါသိမ့်ရေ။





