APM၊ အောက်တိုဘာ ၂၄ / ၂၀၂၃
ဘင်္ဂလားပင်လယ်အော်မာ ဖြစ်ပေါ်နီရေ အားအလွန်ကောင်းရေဆိုင်ကလုန်းမုန်တိုင်း HAMOON စွာ ဘင်္ဂလားဒေ့ချ်ဖက်သို့ ဦးတည်နီပြီးကေ မုန်တိုင်းအဝန်းအဝိုင်းထဲ ကျရောက်နီရေ ရက္ခိုင်ပြည်လည်း မုန်တိုင်း၏ သက်ရောက်မှုကို ခံစားရနိုင်ကြောင်း မိုးလီဝသနန့်ဇလဗေဒ ညွှန်ကြားမှုဦးစီးဌာန(မိုး/ဇလ)က ဒေနိ(အောက်တိုဘာ ၂၄ ရက်နိ) နိခင်း ၂ နာရီအချိန် ထုတ်ပြန်ပါရေ။
ထုတ်ပြန်ချက်အရ ဆိုင်ကလုန်းမုန်တိုင်း HAMOON စွာ အားကောင်းရေ ဆိုင်ကလုန်းမုန်တိုင်းအဖြစ်ရောက်ဟိလားပြီးကေ နောက်ထပ် ၃၆ နာရီအတွင်း ဘင်္ဂလားဒေ့ချ်နိုင်ငံကမ်းခြီကို ခိပူပါရာမြို့နန့် စစ်တကောင်းမြို့အကြားက ဖြတ်ကျော်နိုင်ရေလို့ သိရပါရေ။
မုန်တိုင်း၏လက်ဟိအခြေအနီအရ ရက္ခိုင်ပြည်နန့် တခြားဒေသတိကို ဦးတည်ဝင်ရောက်ဖို့ အခြေအနီမဟိစွာကြောင့် အဝါရောင်အဆင့်သတ်မှတ်ထားကေလေ့ ရက္ခိုင်ပြည်စွာ မုန်တိုင်း၏ အဝန်းအဝိုင်းထဲသို့ ကျရောက်နီလို့ မုန်တိုင်း၏ သက်ရောက်မှုကို ခံစားရနိုင်ရေလို့ ဆိုပါရေ။
မုန်တိုင်းအဟိန်ကြောင့် ရက္ခိုင်ပြည်မာ ဒေသအလိုက်နီရာကွက်လို့ မိုးကြီးနိုင်ရေပိုင် ရက္ခိုင်ကမ်းရိုးတန်း တလျှောက်မာလည်း ရံဖန်ရံခါ မိုးသက်လီပြင်းတိကျရောက်နိုင်ရေလို့လည်း မိုး/ဇလက ဖော်ပြပါရေ။
မိုးသကက်လီပြင်းကျချိန် ရီပြင်၊ မြီပြင်လီစွာ တနာရီကို မိုင် ၄၀ ကနဖိ ၄၅ မိုင်အထိ တိုက် ခတ်နိုင်ကြောင်းနန့် လှိုင်းအမြင့်မာလည်း ၉ ပေက ၁၂ ပေလောက် ဟိနိုင်ရေလို့ သိရပါရေ။
ယင်းအပြင် မုန်တိုင်းအဟိန်ကြောင့် လီပြင်းတိုက်ခတ်ခြင်း၊ မိုးကြီးခြင်း၊ ရုတ်တရက်ရီကြီးခြင်းနန့်တတူ မြီပြိုခြင်းတိ ဖြစ်ပေါ်နိုင်ရေအတွက် ကုန်းမြင့်ဒေသတိနန့် ရက္ခိုင်ကမ်းရိုးတန်းတလျောက်ဟိ မြစ်ချောင်းနားတိမာ နီထိုင်ရေလူတိအနီနန့် ကြိုတင်သတိပြုနီထိုင်ကတ်ဖို့ သတိပီးတိုက်တွန်းထားပါရေ။
