APM ၊ မာ့ချ် ၂၃ / ၂၀၂၃
လီပြင်းတိုက်ခတ်မှုကြောင့် ပျက်စီးလားခရသည့် ရက္ခိုင်ပြည်မြို့နယ်အသီးသီးမှ စစ်ဖီးယှောင်စခန်းများ၌ အဆောင်များ ပြန်ပြုပျင်ရန် အရေးတကြီး လိုအပ်နီကြောင်း သိရသည်။
ကုန်ခသည့် မာ့ချ် ၂၀ ရက်နိက လီပြင်းတိုက်ခတ်မှုကြောင့် ရသေ့တောင်၊ပုဏ္ဏားကျွန်းနန့်ကျောက်တော်မြို့နယ် စစ်ဖီးယှောင်စခန်းများမှ အဆောင်ပေါင်း ၈၀ ကျော်ခန့် အမိုးအကာများ ပွင့်ထွက်လားသည့်အပြင် တချို့အဆောင်များမှာလေ့ လုံးဝ ပြို ပျက်လားခရသည်။
ယင်းအဆောင်များကို ပြန်ပြုပျင်နီကတ်ကေလေ့ အမိုးအကာများပေါက်ပြဲလား၍ မိုးရာသီအတွက် အဆင်မပြေ သည့် အတွက် အခက်ကြုံနီကတ်ရကြောင်း စစ်ဖီးယှောင်များကပြောသည်။
ယင်းအပြင် စခန်းဟိစစ်ဖီးယှောင်အများစုမှာလေ့ ဝင်ငွေ မဟိ၍ ပြိုပျက်လားသည့် အဆောင်များအား ကိုယ်တိုင် ပြုပျင်ရန် ဆောက်ရန်မှာ မဖြစ်နိုင်သည့်အပြင်တောတောင်များ၌ သစ်၊ဝါးများ လားခွတ်မည်ဆိုကေလေ့ စစ်လက်နက်အကြွင်း အကျန် များ၏ အန္တရာယ်ကို စိုးရိမ်ရသည်ဟု ဆိုသည်။
ရက္ခိုင်တွင် ရက္ခိုင့်တပ်တော် AA နန့် မြန်မာစစ်တပ်ရို့ အပစ်အခတ်ရပ်ပြီးနောက်ပိုင်း စစ်ဖီးယှောင်တချို့ နီရပ်ပြန် နိုင်ခကေလေ့ လက်ဟိအချိန်အထိ နီရပ်မပြန်နိုင်သိမ့်ဘဲ စစ်ဖီးယှောင်စခန်းအသီးသီး၌ ခိုလှုံနီကတ်ရသည့် စစ်ဖီးယှောင်ဦးရေ ၆၀၀၀၀ ကျော် ဟိနီသိမ့်ကြောင်း ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိုနှိုင်းရီးမှူးရုံး (UNOCHA) ၏ ထုတ်ပြန်ချက်အရ သိရသည်။
