APM ၊ ဒီဇမ်ဘာ ၂၃ /၂၀၂၃
ဒေနိ(ဒီဇမ်ဘာ ၂၃ ရက်နိ) မိုးထစောစောမာ မောင်တောမြို့နယ်၊ မြို့သူကြီးအခြီစိုက်အကြမ်း ဖက်စစ်ကောင်စီ၏ နခခ(၅ )တပ်ရင်းကနီ မောင်တောမြို့နယ်၊ ညောင်ချောင်းအုပ်စု၊ရွှီရင်အေးရွာကို ရည်ရွယ် ချက်ဟိဟိ လက်နက်ကြီးနန့် ပစ်ခတ်ခလို့ အသက် ၅၀ အရွယ် အမျိုးသမီးတယောက်ဒဏ်ရာရလားကြောင်း သိရပါရေ။
ထိခိုက်ဒဏ်ရာ ရလားခလူစွာ ရွှီရင်အေးရွာက ဒေါ်တင်တင်လှ (၅၀နှစ်) ဖြစ်ပါရေ။
ဒေနိမိုးစောစော ၂ နာရီကျော်လောက်ကနီ မိုးထ ၆ နာရီအချိန်အထိ မြို့သူကြီး၊ နခခ(၅ ) စစ်ကောင်စီတပ်ရင်းစွာ ရွှီရင်အေးရွာသို့လက်နက်ကြီးနန့် (၉) ကြိမ်တိတိ ပစ်ခတ်ခပါရေ။
ယင်းလက်နက်ကြီးကျည် ၉ လုံးထဲက ၈ လုံးစွာ ရွှီရင်အေးရွာသို့ ကျရောက်ပေါက်ကွဲခပြီးကေ ကျန်တလုံးလည်း ယင်းရွာထဲမာ မပေါက်ကွဲဘဲ ကျန်နီပါသိမ့်ရေ။
ယင်းပိုင် လက်နက်ကြီးကျည်တိ ကျရောက်ပေါက်ကွဲမှုကြောင့် ဒေါ်တင်တင်လှ၏ ဘယ်ဖက်ဒူးဆစ်အထက်နားမာ ထိခိုက်ဒဏ်ရာရလားပါရေ။
ယင်းအပြင် တရွာတည်းနီ ဒေါ်သိန်းနု ပိုင်ဆိုင်ရေ ဆိတ် ၄ ကောင် သီဆုံးလားရပနာ အိမ်တချို့လည်း ပျက်စီးခရရေလို့ ဆိုပါရေ။
လက်ဟိ ဒဏ်ရာရလားလူ ဒေါ်တင်တင်လှမာ မောင်တောမြို့ပြည်သူ့ဆီးရုံကြီးသို့ အရေးပေါ်ပို့ဆောင် ဆီးကုသလျက်ဟိကြောင်း သိရပါရေ။
ယင်း နခခ(၅) တပ်ရင်းစွာ ဒီဇမ်ဘာ ၂၂ ရက်နိ ၊ ညဇာ ၃ နာရီ ၄၀ မိနစ်အချိန် လောက်မာလည်း ရွှီရင်အေးရွာကို ဒရုန်းနန့်ဗုံးနှစ်လုံးပစ်ချခပါသိမ့်ရေ။
