APM၊ နိုဗမ်ဘာ၂၃ / ၂၀၂၃
ပုဏ္ဏားကျွန်းမြို့မာ နိုဗမ်ဘာ ၂၁ ရက်နိက အပြစ်မဲ့ဒေသခံပြည်သူ ၅ ယောက်ကို အိမ်ထောင်စုစာရင်းလူမပြည့်ဆိုပနာ စစ်ကောင်စီတပ်ဖွဲ့ဝင်တိ ဖမ်းဆီးလားကြောင်း သိရပါရေ။
ဖမ်းဆီးခံရလူတိစွာ ပုဏ္ဏားကျွန်းမြို့၊ အလယ်စုရပ်ကွက်က ဦးထွန်းမောင်(၄၄နှစ်)၊ ဦးမောင်စောသန်း(၅၅နှစ်)၊ ဦးထွန်းတင်နု (၅၈နှစ်)၊ ကိုဇော်ဇော်ဝင်း (၂၈နှစ်)၊ ရွာဟောင်းပိုင်းရပ်ကွက်က ကိုမြတ်ကျော်နိုင် (၂၇နှစ်) ရို့ဖြစ်ပါရေ။
နိုဗမ်ဘာ ၂၁ ရက်နိ၊ ညဇာ ၈ နာရီလောက်မာ ပုဏ္ဏားကျွန်းအခြီစိုက် စစ်ကောင်စီတပ် ခမရ (၅၅၀)တပ်ရင်းက တပ်ဖွဲ့ဝင် ၂ဝ လောက် စွာ ပုဏ္ဏားကျွန်းမြို့ထဲသို့ဝင်ပနာ တအိမ်ဝင်တအိမ်ထွက် အိမ်ထောင်စုစာရင်း စစ်ဆီးခပါရေ။
ယင်းပိုင်စစ်ဆီးချိန် အိမ်ထောင်စုစာရင်းမာ ပါရေအတိုင်းလူအပြည့်မဟိဆိုပြီးကေ အိမ်ထောင်ဦးစီးတိဖြစ်တေ အဆိုပါမြို့ခံ ၅ ယောက်ကို ဖမ်းဆီးလားစွာလို့ မိသားစုဝင်တိက ပြောပါရေ။
လက်ဟိ ယင်းဖမ်းဆီးထားရေလူ ၅ ယောက်ကိုပုဏ္ဏားကျွန်းမြို့မရဲစခန်းမာ ထိန်းသိမ်းထားကြောင်း သိရပါရေ။
