APM ၊ စပ်တမ်ဘာ ၂၂ /၂၀၂၃
ရက္ခိုင့်တပ်တော် AA နန့် ဆက်စပ်တေဆိုပျာ မတရားအသင်းဆက်သွယ်မှုပုဒ်မ ၁၇(၁)နန့် တရားစွဲခံထားရရေ ကျောက်တော်မြို့နယ်၊ အပေါက်ဝရွာက ကိုမောင်သက်စိုး(ခ) ကိုမောင်ချေအမှုစွာ ရုံးချိန်း အကြိမ်ကြိမ် အရွှိခံနီရကြောင်း သိရပါရေ။
ကိုမောင်သက်စိုးအမှုကို စပ်တမ်ဘာ ၂၁ ရက်နိ နိခင်း ၁ နာရီလောက်က စစ်တွေမြို့နယ်တရားရုံးမာ (၂၃) ကြိမ်မြောက် ရုံးထုတ်ခကေလေ့ လိုပြသက်သီမရောက်လို့အကြောင်းပြပနာ ရုံးချိန်း ရွှိလိုက်ပါရေ။
ကိုမောင်သက်စိုးစွာ ပြီးခရေ ၂၀၂၂ ခုနှစ် အောက်တိုဘာလမာကျောက်တော်မြို့နယ် ကာဒီရွာ(ခ) သဇင်ရွာက ဆန်စက်ပိုင်သျှင် ဦးလှမောင်သန်းနန့်အတူ ကန်စောက်အခြီစိုက် ခမရ (၅၃၉) တပ်ရင်းသို့ အဖော်လိုက်လားခါ အဖမ်းခံခရစွဖြစ်ပါရေ။
လက်ဟိမာ ဦးလှမောင်သန်းစွာ ဩဂတ်စ် ၂ ရက်နိက လွတ်ငြိမ်းခွင့်နန့် ပြန်လွတ်လားကေလေ့ ကိုမောင်သက်စိုးကတော့ လက်ဟိအချိန်ထိပြန်လွတ်မြောက်လာခြင်းမဟိဘဲ တနှစ်နီးပါးကြာရေအထိ ဆက်လက် အမှုရင်ဆိုင်နီရတုန်းဖြစ်ပါရေ။
ကိုမောင်သက်စိုးမာ မယားနန့်တတူ ၂ နှစ်အရွယ်အချေတယောက်ဟိပြီး လက်ဟိ မယားနန့်သား နီထိုင်စားသောက် ရီးအခက်ကြုံနီရလို့ အပြစ်မဟိကေအယင်ဆုံးပြန်လွှတ်ပီးဖို့ မိသားစုဝင်တိကတောင်းဆိုနီကတ်ပါရေ။
