APM ၊ ဧပြီ ၂၂ / ၂၀၂၄
ကျောက်ဖြူမြို့နယ်မာ ဒေနိ(ဧပြီ ၂၂ ရက်နိ)၊မိုးထစောစောက အကြမ်းဖက်စစ်ကောင်စီတပ်ထောင်ထားရေ မိုင်းကိုနင်းမိလို့ ဒေသခံနှစ်ယောက် ပြင်းပြင်းထန်ထန် ဒဏ်ရာရလားရေလို့ သိရပါရေ။
ဒဏ်ရာရလားသူတိစွာ ကျောက်ဖြူမြို့နယ်၊ ဂုံးချွိန်တိုက်နယ်၊ ပြိုင်းစေ့ကေရွာက ဦးတင်ဝင်း (၄၅ နှစ် )နန့် ဦးမောင်မြင့်ဝင်း ( ၃၀ နှစ်) ရို့ ဖြစ်ပါရေ။
ဒေနိ မိုးထ ၇ နာရီဝန်းကျင်လောက်က ဦးတင်ဝင်းနန့် ဦးမောင်မြင့်ဝင်းရို့စွာ သူရို့နီထိုင်ရေ ပြိုင်းစေ့ကေရွာအနားဟိ ဝက်ခုတ်တောင်သို့ အိမ်တိုင်ထမ်းဖို့လားရာ ယင်းတောင်ထက်က လူလားလမ်းအလယ်တည့်တည့်မာ အကြမ်းဖက်စစ်ကောင်စီတပ်ထောင်ထားရေ မိုင်းကို နင်းမိပနာ ပေါက်ကွဲမှုဖြစ်ခစွာလို့ ရွာသားတိကပြောပါရေ။
အဆိုပါမိုင်းပေါက်ကွဲမှုကြောင့် ဦးတင်ဝင်း၏ ဘယ်ဖက်ခြီ ဒူးဆစ်အောက်က လုံးဝပြတ်ထွက်လားခရေပိုင်၊ ဦးမောင်မြင့်ဝင်းမာလည်း ခန္ဓာကိုယ်အနှံ့ မိုင်းစထိမှန် ဒဏ်ရာ ပြင်းပြင်းထန်ထန်ရလားရေလို့ ဆိုပါရေ။
လက်ဟိမာ သူရို့ ၂ ယောက်စွာ အရေးပေါ် ဆီးကုသမှုခံယူနီရရေလို့ သိဟိရပါရေ။
ကုန်ခရေ ဧပြီ ၂၀ ရက်နိကလည်း အကြမ်းဖက်စစ်ကောင်စီတပ်ထောင်ထားရေမိုင်းကိုနင်းမိလို့ ကျောက်ဖြူမြို့နယ် ၊ ဂုံးချွိန်တိုက်နယ် ၊ နှမ်းဖဲတောင်ရွာက ရွာသားတယောက် ခြီထောက်တဖက်ပြတ်ထွတ်လားခပါသိမ့်ရေ။
