APM ၊ ဧပြီ ၂၂ / ၂၀၂၃
မြောက်ဦးမြို့၊ မြို့မဈီးထဲတွင် ဒေနိ(ဧပြီ ၂၂ ရက်နိ) မိုးထက သက်ကြီးပိုင်းအရွယ်အမျိုးသားတဦး ရုတ်တရက် လဲကျသီဆုံးလားကြောင်း သိရသည်။
သီဆုံးလားသူမှာ မြောက်ဦးမြို့နယ်၊ ပရိန်ကုန်းရွာမှ ဦးစောသာထွန်း(၆၂ နှစ်) ဖြစ်သည်။
ဦးစောသာထွန်းသည် ဒေနိမိုးထက ရွာမှဆိုင်ကယ်တစီးဖြင့် မြောက်ဦးမြို့ ၊ မြို့မဈီးသို့ ဈီးဝယ်ရန် ထွက်လာ ပြီးနောက် ဈီးထဲ၌ ဈီးဝယ်နီစဉ် မိုးထ ၉ နာရီကျော်တွင် ရုတ်တရက်လဲကျလားကာ သီဆုံးလားခြင်းဖြစ်သည်။
မိသားစုဝင်များ၏ပြောကြားချက်အရ ဦးစောသာထွန်းတွင် တခြားရောဂါအခံလေ့ မဟိဘဲ ရုတ်တရက်လဲကျ သီဆုံး ခြင်းဖြစ်ကာ ဒေရက်ပိုင်းအတွင် အပူချိန်ပြင်း၍ဟု ယူဆကတ်သည်။
ယင်းအပြင် သီဆုံးသူ၏ ရုပ်အလောင်းကို မြောက်ဦးဆီးရုံကြီးသို့ ပို့ဆောင်ခကတ်ရာ၌လေ့ အပူချိန်မြင့်တက်မှုကြောင့် သီဆုံးခြင်းဖြစ်နိုင်သည်ဟု ကျန်းမာရီးဝန်ထမ်းများက မှတ်ချက်ပီးကတ်သည်။
ရက္ခိုင်ပြည်တွင် ဒေနှစ်နွီရာသီအပူချိန်သည် ပြီးခသည့်နှစ်များကထက် ပိုမိုမြင့်တက်နီပြီး အယင်နှစ်များက နွီရာသီ ပျမ်းမျှအပူချိန်မှာ ၃၄ ဒီဂရီစင်တီဂရိတ်ရာဟိခကေလေ့ ဒေနှစ်တွင် ၄၀ ဒီဂရီစင်တီဂရိတ်ထိ ရောက်ဟိနီကြောင်း မိုးလီဝသနန့် ဇလဗေဒညွှန်ကြားမှုဦးစီးဌာနမှ သိရသည်။
လာမည့်ကာလများတွင်လေ့ အပူချိန် ဆက်လက်မြင့်တက်လာနိုင်ပြီး သက်ကြီးရွယ်အိုများ၊ အချေများ၊ ကိုယ်ဝန် ဆောင်များ၊ နို့တိုက်မိခင်များ၊ နာတာရှည်ရောဂါသည်များနန့် အဝလွန်သူများမှာ ရာသီဥတု ပူပြင်းမှုဒဏ်ကို ပိုခံစားရနိုင်၍ အထူးဂရုစိုက်နီထိုင်ကတ်ရန် ကျန်းမာရီးဦးစီးဌာနက ထုတ်ပြန်ထားသည်။
