APM ၊ မာ့ချ် ၂၂ / ၂၀၂၃
တရုတ်သမ္မတ ချီကျင့်ဖျင်နန့် ရုသျှသမ္မတ ပူတင်ရို့သည် နှစ်နိုင်ငံအကြားမဟာဗျူဟာပူးပေါင်းရီးစာချုပ်သစ်တရပ်ကို မာ့ချ် ၂၁ ရက်နိ၌ လက်မှတ်ရွီးထိုးလိုက်ကြောင်းသိရသည်။
ပြီးခသည့် မာ့ချ် ၁၇ ရက်နိ၌ နိုင်ငံတကာရာဇဝတ်ခုံရုံး (ICC) က သမ္မတပူတင်ကို ဖမ်းဝရမ်းထုတ်ခပြီးနောက် ရက်ပိုင်းအကြာတွင် သမ္မတချီကျင့်ဖျင်နန့် ရုသျှသမ္မတရို့အကြား ယင်းသို့လက်မှတ်ရွီးထိုးလိုက်ခြင်းဖြစ်ပြီး ဤစာချုပ်သည် နှစ်နိုင်ငံအကြား အကန့်အသတ်မဟိ မိတ်ဖက်ဆက်ဆံရီးကို ခိုင်မာစီမည့် သဘောတူညီချက်တရပ် ဖြစ်သည်။
အစည်းအဝေးအတွင်း တရုတ်သမ္မတချီကျင့်ဖျင်က ၁၀ နှစ်ကြာ ကာလတွင် မိမိနန့် သမ္မတပူတင်သည် နီးကပ်သည့် ဆက်ဆံရီးကို ထိန်းသိမ်းထားခကြောင်း၊ နှစ်ဦးနှစ်ဖက်အားထုတ်မှုကြောင့် ခိုင်မာအားကောင်းသည့် နှစ်နိုင်ငံဆက် ဆံရီးသည် ဆက်လက်တိုးတက်နီပြီး နိုင်ငံရီးအရ အပြန်အလှန်ယုံကြည်မှုနန့် နှစ်နိုင်ငံစလုံး၏ အကျိုးစီးပွားကို ရဟိခကြောင်း ပြောကြားခသည်။
အလားတူ ရုသျှသမ္မတပူတင်ကလေ့ တရုတ်နိုင်ငံနန့် ပူးပေါင်းဆောင်ရွက်မှုဖြင့် ယခုနှစ်များတွင် ရုသျှ-တရုတ် ဆက်ဆံရီးသည် ကဏ္ဍအသီးသီး၌ အောင်မြင်မှုများစွာ ရဟိခကြောင်း၊ ရုသျှအနီနန့် တရုတ်နိုင်ငံနန့်တတူ ဆက်လက်၍ ပူးပေါင်းဆောင်ရွက်မှုများကို ပြုလုပ်လားမည်ဖြစ်ပြီး၊ နိုင်ငံတကာရီးရာ၊ကုလသမဂ္ဂစသည့် နိုင်ငံစုံ ပလက်ဖောင်းများတွင် ညှိနှိုင်းပူးပေါင်းလားမည်ဟု ဆိုသည်။
ယင်းနောက် နှစ်နိုင်ငံဂေါင်းဆောင်နှစ်ယောက်သည် ယူကရိန်းအရေးနန့်စပ်လျဉ်း၍ နှစ်ဖက် အမြင်သဘောထားများကို ဖလှယ်ခကတ်ပြီး၊ တရုတ်နိုင်ငံအနီနန့် နိုင်ငံရီးနည်းလမ်းဖြင့် ယူကရိန်းအရေးဖြေယှင်းမှုကို တွန်းအားပီး ဆောင်ရွက်ရာတွင် အပြုသဘောအခန်းကဏ္ဍမှ ဆက်လက်ပါဝင်ဆောင်ရွက်လားမည်ဟု ပြောကြားသည်။
သမ္မတပူတင်ကလေ့ ရုသျှနိုင်ငံအနီနန့် နိုင်ငံတကာရီးရာ အရေးကြီးကိစ္စရပ်များတွင် တရုတ်၏ ရပ်တည်ချက်ကို တန်ဖိုးထားပြီးအပြုသဘောအခန်းကဏ္ဍမှပါဝင်ခြင်းကိုကြိုဆိုကြောင်း၊ ရုသျှအနီနန့်ယူကရိန်းအကျပ်အတည်းအတွက်ငြိမ်းချမ်းရီးတွိဆုံ ဆွေးနွေးမှုကို တန်းခါးဖွင့်ထားသည်ဟု ဆွေးနွေးပြောကြားခကြောင်း သိဟိရသည်။
Source – Russia-China ties enter ‘new era’ as Xi meets Putin in Moscow
Photo – Reuters
