APM ၊ ဖေဖော်ဝါရီ ၂၂ / ၂၀၂၃
မြန်မာစစ်တပ်ဖမ်းယူလားပြီးနောက် မတရားအသင်းဆက်သွယ်မှုဥပဒေပုဒ်မ ၁၇(၁) နန့် တရားစွဲဆိုခံထားရသည့် ကျောက်ဖြူဒေသခံ နှစ်ယောက်အမှုကို ဖေဖော်ဝါရီ ၂၁ ရက်နိတွင်ကျောက်ဖြူမြို့နယ်တရားရုံး၌ (၁၀) ကြိမ်မြောက်ရုံးထုတ်ပြီး၊ ဒေဂုရုံးချိန်းတွင်လေ့ တရားလိုမရောက်၍ မစစ်ဆီးနိုင်ခဘဲ လာမည့်ဖေဖော်ဝါရီ ၂၈ ရက်နိသို့ ရုံးချိန်းထပ်ရွှိလိုက်ကြောင်း သိရသည်။
ပုဒ်မ ၁၇(၁)ဖြင့် တရားစွဲခံထားရပြီး ရုံးချိန်းအလီလီ ရွှိဆိုင်းခံနီရသူ နှစ်ယောက်မှာ ကျောက်ဖြူမြို့နယ်၊ မင်းတက်တောင်ရွာမှ ဦးသိန်းတန်(၄၇ နှစ်)နန့် ဦးတင်အောင်(၅၀နှစ်) ရို့ဖြစ်ကတ်သည်။
သူရို့ကို ဖေဖော်ဝါရီ ၂၁ ရက်နိ နိခင်း ၂ နာရီခွဲကျော်ခန့်တွင် ကျောက်ဖြူမြို့နယ်တရားရုံး၌ ရုံးထုတ်ခကေလ့ တရားလိုဖက်မှ ရုံးချိန်းပျက်ကွက်၍ မစစ်ဆီးနိုင်ခဘဲ လာမည့် ဖေဖော်ဝါရီ ၂၈ ရက်နိသို့ ရုံးချိန်းထပ်ရွှိလိုက်ကြောင်း မိသားစုဝင်များက ပြောသည်။
ဦးတင်အောင်နန့် ဦးသိန်းတန်ရို့ကို ကုန်ခသည့် ၂၀၂၂ ခုနှစ် နိုဗမ်ဘာ ၆ ရက်နိ၌ ကျောက်ဖြူအခြီစိုက် မြန်မာစစ်တပ် ခလရ(၃၄)မှ တပ်ဖွဲ့ဝင်များက ဖမ်းယူလားခပြီးနောက် နိုဗမ်ဘာ ၁၃ ရက်နိတွင် ကျောက်ဖြူမြို့နယ်တရားရုံး၌ ပုဒ်မ ၁၇(၁)နန့် သူရို့နှစ်ယောက်ကို တရားစွဲဆိုထားခြင်းဖြစ်သည်။
ယင်းအချိန်မှစ၍ လက်ဟိအထိ ရုံးချိန်း (၁၀) ကြိမ်တိုင်တိုင်ဟိနီယာဖြစ်ပြီး ရုံးချိန်းတိုင်း၌ မြန်မာစစ်တပ်ဖက်မှ တရားလို မရောက်၍ ရုံးချိန်းအကြိမ်ကြိမ်ရွှိဆိုင်းနီရကြောင်း သိရသည်။
လက်ဟိတွင် သူရို့နှစ်ယောက်ကို ကျောက်ဖြူအကျဉ်းထောင်၌ ထိန်းသိမ်းချုပ်နှောင်ထားကြောင်း သိဟိရသည်။
