APM၊ ဒီဇမ်ဘာ ၂၂/၂၀၂၃
ဒေနိ (ဒီဇမ်ဘာ ၂၂ရက်နိ)မိုးထကစလို့ မောင်တောမြို့နယ်ဟိ ရပ်ရွာတိကို စစ်ကောင်စီတပ်က လက်နက်ကြီး၊ လက်နက်ချေ တိနန့် ရည်ရွယ် ချက်ဟိဟိ ပစ်ခတ်နီရေလို့ သိရပါရေ။
ဘူးသီးတောင်အခြီစိုက် စစ်ကောင်စီတပ်တိဖြစ်တေ စကခ (၁၅)၊ ခလရ(၂၆၃)၊ တောင်ခေါင်းကြီးအထက်တာဝါတိုင်ကုန်း နန့် မောင်တောအခြီစိုက် စစ်ကောင်စီနယ်ခြားစောင့်တပ် နခခ(၂)၊ နခခ(၅)ရို့ကနီ မောင်တောမြို့နယ်ဟိ ရပ်ရွာတိကို ပစ်ခတ်နီစွာဖြစ်ပါရေ။
ယင်းလက်နက်ကြီးကျည်တိထဲက တချို့စွာ မောင်တောမြို့နယ်၊ ကံသာယာ(အလယ်)ရွာနားမာ (၅)လုံးကျရောက် ပေါက်ကွဲ ခပိုင် တခြား ရပ်ရွာတိအနားမာလည်း ကျရောက်ပေါက်ကွဲနီရေလို့ သိရပါရေ။
ယင်းအပြင် နိခင်း ၁၁ နာရီကျော်လောက်မာလည်း စစ်ကောင်စီ၏ ဗောဓိကုန်း ရဲကင်းစခန်းကနီ ကံသာယာ(အလယ်)ရွာ နားတိကိုရည်ရွယ်ချက်ဟိဟိ လက်နက်ချေနန့် ယမ်းသန်းပစ်ခတ်ခပါသိမ့်ရေ။
ရက္ခိုင်မာ ရက္ခိုင့်တပ်တော်AAနန့် စစ်ကောင်စီတပ်ရို့တိုက်ပွဲဖြစ်ပြီးနောက်ပိုင်း စစ်ကောင်စီတပ်က အရပ်သားပြည်သူတိ နီထိုင်ရေ ရပ်ရွာ၊မြို့တိကို လက်နက်ကြီး၊ လက်နက်ချေတိနန့် ရည်ရွယ်ချက်ဟိဟိ နိစဉ်နိတိုင်း ယမ်းကား ပစ်ခတ်တိုက်ခိုက် လို့ဟိနီပါရေ။
