APM ၊ ဒီဇမ်ဘာ ၂၂ / ၂၀၂၃
ပါကစ္စတန်နိုင်ငံ၊ အစ္စလာမ်မာဘတ်မြို့မာ ဒီဇမ်ဘာ ၂၁ ရက်နိက ရဲတပ်ဖွဲ့၏ တရားလက်လွတ်သတ်ဖြတ်မှုတိနန့် ပတ်သက်လို့ ကန့်ကွက် ဆန္ဒပြခကတ်တေလူ ၂၀၀ လောက်ကို ပါကစ္စတန်ရဲတပ်ဖွဲ့က ဖမ်းဆီးခကြောင်း သိရပါရေ။
အချေသူငယ်နန့် အမျိုးသမီးတိပါဝင်ရေ ဆန္ဒပြလူ ၂၀၀ လောက်ရေ တာဘတ်မြို့ကနီ အစ္စလာမ်ဘတ်မြို့ကို ဦးတည်ချီတက်လာကတ်စွာမာ ရဲတပ်ဖွဲ့က ရီပိုက်တိ၊ နံပါတ်တုတ်တိအသုံးပြုပနာ ဖမ်းဆီးခစွာဖြစ်ပါရေ။
ကုန်ခရေ နိုဗမ်ဘာလအတွင်းက ဖောက်ခွဲရီးပစ္စည်းတိလက်ဝယ်တွိဟိခရေဆိုပနာ ရဲတပ်ဖွဲ့ကဖမ်းဆီးထိန်းသိမ်းထားချိန် သီဆုံးခရရေ အသက် ၂၄ နှစ်အရွယ်အမျိုးသား ဗာလခ်မိုလာ ဘတ်ချ်အတွက် တရားမျှတမှုရဟိရီး ဒေဂုပိုင် ဆန္ဒပြချီ တက်ခကတ်စွာလို့ ဆန္ဒပြသမားတိက ဆိုပါရေ။
လူ့အခွင့် အရေး လှုပ်ယှားလူတိနန့် မိသားစုတိကလည်း ဗာလခ်မိုလာဘတ်ချ်ကို ရဲတပ်ဖွဲ့က အကြမ်းဖက် နှိပ်စက်ပြီးကေ ရည်ရွယ်ချက်ဟိဟိ သတ်ဖြတ်ခစွာလို့ စွပ်စွဲထားပါရေ။
ဘာချီလူစတန်ပြည်နယ် ရဲတပ်ဖွဲ့ကတော့ ဗာလခ်မိုလာဘတ်ချ်ကို ဖမ်းဆီးပြီး ၂ ရက်အကြာမာ ရဲဗင်ကားကို ဆန္ဒပြလူတိက ခြုံခိုတိုက်ခိုက်ခစွာကြောင့် သီဆုံးခစွာလို တုံပြန်ပြောဆိုထားပါရေ။
Source – Pakistan arrests activists to stop them from protesting in Islamabad against extrajudicial killings
Photo – EPA
