APM ၊ ဒီဇမ်ဘာ ၂၂ / ၂၀၂၂
ရသေ့တောင်မြို့နယ်၊ စေတီပြင်ချောင်းဝ၌ ဒီဇမ်ဘာ ၂၁ ရက်နိက ဟွန်ဒါ စက်တစီးနန့် ကုန်တင်ဘုတ်ကြီးတစီး တိုက်မိရာ ဟွန်ဒါတွင် လိုက်ပါလာသူ တယောက် ပျောက်ဆုံးနီပြီး၊ နောက်ထပ်တယောက်လေ့ ဒဏ်ရာရလား ကြောင်း သိရသည်။
ပျောက်ဆုံးနီသူမှာ ရသေ့တောင်မြို့နယ်၊ ရီစိုးချောင်းရွာသား (စေတီပြင်စစ်ဖီးယှောင်စခန်းနီထိုင်သူ) ဦးသန်းရွှေ လှိုင် (၄၄ နှစ်) ဖြစ်ပြီး၊ စေတီပြင်စစ်ဖီးယှောင်စခန်းနီထိုင်သည့် ရီစိုးချောင်းမှ ဦးမောင်သာစိန် (၄၆)နှစ်မှာ ဒဏ်ရာ ရလားခသူ ဖြစ်သည်။
ဦးသန်းရွှေလှိုင်နန့် ဦးမောင်သာစိန်ရို့သည် စေတီပြင်စစ်ဖီးယှောင်စခန်းမှ အသက် ၈နှစ်အရွယ်အချေ တယောက် ဆိုင်ကယ်တိုက်မိ၍ ခြီချင်းဝတ်ကျိုးလားသည်ကို တိုင်းရင်းဆီးဖြင့်ကုသရန် ဒီဇမ်ဘာ ၂၁ ရက်နိ ညဇာ ၆ နာရီခန့်၌ ဟွန်ဒါတစီး နန့် ပိတောက်မြိုင်ရွာသို့ ထွက်ခွာလာရာ၊ ချွတ်ပြင်ရွာမြောက်ဖက်ချောင်းကွေ့အရောက်တွင် ၎င်းရို့ စီး နင်းလာသည့် ဟွန်ဒါအား ကုန်တင်ဘုတ်ကြီးတစီးမှ မတော်တဆ ဝင်တိုက်မိခြင်းဖြစ်သည်။
ယင်းသို့ ဖြစ်စဉ်၌ ဦးသန်းရွှေလှိုင်မှာ ချောင်းထဲကျလားပြီး ပျောက်ဆုံးနီကာ၊ ဦးမောင်သာစိန်မှာလေ့ ဘယ်လက်၊ နောက်ကုန်းနန့် ညာဖက်မျက်ခုံးရို့တွင် ဒဏ်ရာရဟိလားခသည်။ ဆီးကုမည့်အချေမှာတော့ တစုံတရာထိခိုက်မှု မဟိဟု သိရသည်။
ဒဏ်ရာရဟိလားခသူ ဦးမောင်သာစိန်အား စေတီပြင်ဆီးတိုက်နယ် ဆီးရုံ့သို့ ပို့ဆောင်လိုက်ပြီး၊ ပျောက်ဆုံးနီသူ ဦးသန်းရွှေလှိုင်အား ဆက်လက်ရှာဖွီလျက်ဟိရာ လက်ဟိအချိန်ထိ ရှာမတွိသိမ့်ကြောင်း သိရသည်။
ယင်းအပြင် ဟွန်ဒါအားဝင်တိုက်ခသည့် ကုန်တင်ဘုတ်ကြီးမှာလေ့ မောင်းနှင်ထွက်ဗြီးလားခသည့်အတွက် သက် ဆိုင်ရာ တာဝန်ဟိသူများမှ ဥပဒေနန့်အညီ အရေးယူဆောင်ရွက်နိုင်ရီး လိုက်လံရှာဖွီလျက်ဟိကြောင်း သိဟိရ ပါသည်။
