
APM၊ နိုဗမ်ဘာ ၂၂ /၂၀၂၃
ဒေနိ(နိုဗမ်ဘာ ၂၂ ရက်နိ)မိုးထက ရသေ့တောင်မြို့နယ်မာ စစ်ကောင်စီတပ်၏ ရီစိုးချောင်းဗျူဟာက လက်နက်ကြီးပစ်ခတ်မှုကြောင့် အပြစ်မဲ့ဒေသခံပြည်သူတယောက် ဒဏ်ရာရလားရေလို့ သိရပါရေ။
ဒဏ်ရာရလားလူမာ ရသေ့တောင်မြို့နယ်၊ င/စံဘော်ရွာက ဦးကျော်သန်းမောင်(၄၈ နှစ်) ဖြစ်ပါရေ။
ဒေနိမိုးထ ၉ နာရီလောက်စလို့ ရသေ့တောင်မြို့နယ် အခြီစိုက်စစ်ကောင်စီတပ်ရီစိုးချောင်းဗျူဟာကနီ င/စံဘော်ရွာထဲသို့ လက်နက်ကြီးနန့် ဦးတည်တိုက်ခိုက်နီကြောင်း ရွာသားတိကပြောရေ။
ယင်းလက်နက်ကြီးကျည်တိထဲက ၄ လုံးစွာ င/စံဘော်ရွာထဲကိုကျရောက်ပေါက်ကွဲခပြီးကေ ဦးကျော်သန်းမောင်၏ ဘယ်ဖက်ခြီထောက်မာ အလတ်စား ဒဏ်ရာရလားရေလို့ ဆိုပါရေ။
ရွာထဲက လူနီအိမ်တချို့ လက်နက်ကြီးကျည်ကျရောက်ပေါက်ကွဲမှုကြောင့် ပျက်စီခရရေပိုင် ရွာသားတိအားလုံးလည်း ဖီးလွတ်ရာမာ တိမ်းယှောင်နီကတ်ရရေလို့ သိရပါရေ။
ရက္ခိုင်မာ ရက္ခိုင့်တပ်တော်AAနန့် စစ်ကောင်စီတပ်ရို့တိုက်ပွဲဖြစ်ပြီးနောက်ပိုင်း စစ်ကောင်စီတပ်က အရပ်သားပြည်သူတိနီထိုင်ရေ ရပ်ရွာတိကို လက်နက်ကြီး၊ လက်နက်ချေတိနန့် ရည်ရွယ်ချက်ဟိဟိ ပစ်ခတ်တိုက်ခိုက်နီပါရေ။
တချိန်တည်းမာ ယင်းလက်နက်ကြီးကျည်တိကြောင့်လည်း အရပ်သားပြည်သူတိ သီဆုံး၊ ထိခိုက်ဒဏ်ရာရမှု၊ အိုးအိမ်အဆောက်အအုံပျက်စီဆုံးယှုံးမှုတိ နိတိုင်း ဖြစ်ပွားနီပါရေ။
