APM၊နိုဗမ်ဘာ ၂၂/၂၀၂၃
၁၀၂၇ စစ်ဆင်ရီး၏ ဒေနိ(နိုဗမ်ဘာ ၂၂ ရက်နိ) မာလည်း တအောင်းပြည်နယ်၊ လားသျှိုးနန့် သိန္နီအပါအဝင် တခြားဒေသတချို့မာ တအောင်းမတော် TNLA နန့်စစ်ကောင်စီ ရို့ တိုက်ပွဲတိဆက်လက်ဖြစ်ပွားနီပြီးကေ စစ်ကောင်စီ၏ လက်နက်ကြီးပစ်ခတ်မှုကြောင့် ကိုရင် ကြီးတပါးဒဏ်ရာရလားခရေလို့ TNLA က ဒေနိညဇာ ထုတ်ပြန်ပါရေ။
ထုတ်ပြန်ချက်အရ တပ်မဟာ(၄)စစ်ဒေသ၊ လားသျှိုးနန့် သိန္နီကြား (၁၃မိုင် နန့် ၁၄ မိုင်)ကြားမာ စစ်ကူရောက် လာရေ စစ်ကောင်စီတပ်ကို တအာင်းတပ်မတော် PSLF/TNLA က တိုက်ခိုက်ခပြီးကေ ယင်းတိုက်ပွဲအတွင်း လက်နက် (၄)လက် သိမ်းဆည်းရမိခရေ လို့ဆိုပါရေ။
အလားတူ တပ်မဟာ(၂)စစ်ဒေသ၊ သီပေါမြိုနယ် ကျင်တီတံတားမာ စစ်ကောင်စီတပ်နန့် တအာင်းတပ်မတော် TNLAရို့ဒေနိ မိုးထ ၆ နာရီ ၃၀ မိနစ် အချိန်မာ တိုက်ပွဲဖြစ်ပွားခပိုင် တပ်မဟာ (၁)စစ်ဒေသ၊ နမ့်ခမ်းမြို စစ်ကောင်စီ စခန်းသစ်ကုန်းမာလည်း စစ်ကောင်စီတပ်နန့်တအာင်းတပ်မတော် TNLA ရို့ ဒေနိ တရက်အတွင်း တိုက်ပွဲ (၃) ကြိမ် ဖြစ်ပွားခရေလို့သိရပါရေ။
ယင်းအတူ ဒေနိ မိုးထ ၇ နာရီ ၂၀ မိနစ် အချိန်မာ စစ်ကောင်စီတပ်က ထောက်ပို့လီယာဉ် Y-12 နန့် တိုက်ပွဲဖြစ်တေ လားသျှိုးမြိုနယ် မိုင်းကျက်တပ်စခန်းဖက်မာ ဗုံး(၄၅)လုံး ထက်မနည်း ကြဲချခရေလို့ TNLA က ဆိုပါရေ။
ယင်းအပြင် တပ်မဟာ(၁)စစ်ဒေသ၊ မူဆယ်မြို့နယ် ၁၀၅ မိုင်ဟိ စစ်ကောင်စီတပ်စခန်းက ဒေနိ နိခင်း ၁၁နာရီ ၅၀မိနစ် နာရီအချိန်မာ လက်နက်ကြီးနန့် (၅)ကြိမ် ပစ်ခတ်တိုက်ခိုက်ခပြီးကေ ယင်းလက်နက်ကြီးကျည်စွာ အောက်နမ့်ဟွယ် ကျေးရွာ၊ ဇေယျမင်္ဂလာဘုန်းကြီးကျောင်းတိုက်အတွင်း ကျရောက်ပေါက်ကွဲခလို့ ကိုရင်ကြီး ၁ ပါး ပေါင်နှစ်ဖက်လုံး ကျည်စထိမှန်ဒဏ်ရာရလားခကြောင်း TNLA၏ထုတ်ပြန်ချက်မာဖော်ပြထား ပါရေ။
