
APM၊ စပ်တမ်ဘာ ၂၁/ ၂၀၂၃
မြန်မာပြည်မာ လူသားချင်းစာနာမှုဆိုင်ရာ ဝင်ရောက်ကူညီခွင့်အတွက် ကန့်သတ်ချက်တိ များလာနီကြောင်း ကုလသမဂ္ဂလူသားချင်း စာနာထောက်ထားမှုဆိုင်ရာ ညှိနှိုင်းပေါင်းစပ်ရီးရုံး(UNOCHA)က စပ်တမ်ဘာ ၂၀ ရက်နိမာ ထုတ်ပြန်ပါရေ။
လူသားချင်းစာနာမှုဆိုင်ရာ အကူအညီပီးရီးစွာ အထူးသဖြင့် ကချင်ပြည်နန့် အရှိတောင်ပိုင်းဒေသတိမာ ကန့်သတ်ချက်တိ များလာပြီးကေ အရေးပါရေ အကူအညီတိ ပီးအပ်နိုင်ဖို့ အဟန့်အတားဖြစ်နီရေလို့ ထုတ်ပြန်ချက်မာ ဖော်ပြပါရေ။
ယင်းအပြင် မြန်မာပြည်တဝန်း လက်နက်ကိုင်ပဋိပက္ခတိဖြစ်ပွားနီပြီးကေ အထူးသဖြင့် စစ်ကိုင်းနန့် ချင်းပြည်ရို့ပိုင် မြန်မာပြည် အနောက်မြောက်ပိုင်းနန့် ကရင်ပြည်၊ ကရင်နီပြည်နန့် ပဲခူးရို့ပိုင် အရှိ တောင်ပိုင်းဒေသတိမာ တိုက်ပွဲတိ ဆက်ဖြစ်နီရေအတွက် အိုးအိမ်စွန့်ခွာထွက်ဗြီးရေလူ ပိုများလာပနာ အရပ်သား ထိခိုက်သီဆုံးမှုတိလည်း ဆက်ဟိနီရေလို့ ဆိုပါရေ။
ကုလသမဂ္ဂ၏ နောက်ဆုံးကိန်းဂဏန်းတိအရ ၂၀၂၃ခုနှစ်၊ စပ်တမ်ဘာ ၁၁ ရက်နိအထိ မြန်မာပြည်တဝန်းမာ ပြည်တွင်းနီရပ် စွန့်ခွာလူဦးရေ ၁ ဒသမ ၉ သန်းကျော်ဟိလာယာ ဖြစ်ပါရေ။
တဆက်တည်းမာပင် ဆိုးရွားရေ ရာသီဥတုအခြေအနီတိကြောင့် နီရာအများအပြားမာ ရီကြီးရီလျှံမှုတိ ဆက်လို့ဖြစ်နီပြီးကေ ဟိရင်းစွဲဒုက္ခတိနန့် ရင်ဆိုင်နီရရေလူတိအတွက် နီထိုင်ရီးကို ပိုလို့ဆိုးရွားစီရေလို့ ပါဟိပါရေ။
စစ်ကိုင်း၊ ကလေးမြို့မာ စပ်တမ်ဘာ ၈ ရက်နိက ရီကြီးလို့ လူ ၁,၀၀၀ လောက်ကို ဖီးကင်းရာသို့ ရွှိပြောင်းခရပြီးကေ အရှိတောင် ပိုင်းဒေသတိမာလည်း ဩဂတ်စ်လက ရီဖီးသင့်ပြည်သူ ၈၀,၀၀၀ ကျော်အထိ ဟိခစွာက တချို့ နီရပ်ပြန်ခကတ်ကေလေ့ အများအပြား ရွှိပြောင်းနီထိုင်ရတုန်းဖြစ်ပနာ အရေးပေါ်အကူအညီတိလိုအပ်နီကြောင်း ထုတ်ပြန်ချက်မာ ဖော်ပြထားပါရေ။
Source – Asia and the Pacific: Weekly Regional Humanitarian Snapshot (12 – 18 September 2023) – Myanmar
Photo – UNOCHA
